ԵՐԵՎԱՆ, 27 փետրվարի- Sputnik. Հայաստանում անցկացված հարցման մասնակիցների մեծ մասը՝ 59 տոկոսը, կարծում է, որ մեր երկրում տարածված է ֆիզիկական բռնությունը, 43 տոկոսը՝ հոգեբանական բռնությունը, 4 տոկոսը՝ սեռական բռնությունը, 30 տոկոսը՝ անտեսումը:Այս մասին նշված է աշխատանքի և սոցիալական հարցերի նախարարության Երեխայի հանդեպ բռնության վերաբերյալ հետազոտության մեջ:
Երեխաներն առավել հաճախ բռնության են ենթարկվում մայրերի կողմից, համոզված է հարցմանը մասնակցած կանանց և տղամարդկանց մածամասնությունը, համապատասխանաբար` 83% և 79%-ը: Իսկ ուսումնական հաստատություններում դայակներն ու դաստիարակները երեխաներին ավելի շատ ենթարկում են ֆիզիկական, իսկ ուսուցիչները՝ հոգեբանական բռնության:
Հարցմանը մասնակցած մեր համաքաղաքացիների 44 տոկոսը գտնում է, որ երեխայի նկատմամբ բռնության խնդիրը հրատապ լուծման կարիք ունի, 25 տոկոսն այդ ուղղությամբ ընդհանրապես չի մտածել: Ի դեպ, քաղաքաբնակաների 79 տոկոսը համոզված է, որ խնդիրը հրատապ լուծում է պահանջում:
Երեխային բռնության ենթարկելն ընտանիքում վատ սովորության՝ հարբեցողության, թմրամոլության, խաղամոլության հետևանք է, կարծում է հարցվածների 84 տոկոսը: Իսկ 50 տոկոսը դրա պատճառը տեսնում է ընտանիքում ճգնաժամային իրավիճակի առկայության մեջ, 18 տոկոսն էլ համոզված է, որ պատճառը աղքատությունն է կամ սոցիալական անապահովությունը: Հարցվածների 48 տոկոսն էլ նշել է, որ երեխայի նկատմամբ բռնության կիրառումը բռնություն գործադրողի հոգեկան կամ մտավոր հիվանդության առկայության հետևանք է:
Երեխայի հանդեպ բռնությունը կանխարգելելու համար, հարցվածների 60 տոկոսի կարծիքով, պետք է տևական մասնագիտական աշխատանք տարվի ընտանիքների հետ, 24 տոկոսի կարծիքով` պետք են օրենսդրական փոփոխություններ:
Նշենք, որ հարցումն անցկացվել է հանրապետության բոլոր մարզերում ու Երևանում՝ առնվազն մեկ անչափահաս երեխա ունեցող 1215 ընտանիքներում:
