Լաուրա Սարգսյան, Sputnik
Համացանցի և սոցիալական ցանցերի դարաշրջանում մարդու կյանքի առավել անձնական երևույթը դարձել է գաղտանգիրը։ Հավաքելով այս կամ այն սոցցանց մտնելու գաղտնագիրը` շատերը չեն մտածում, որ սահմանափակվելով ծննդյան տարեթվով կամ ազգանունով` ընկնում են վտանգված խմբի մեջ, ավելի ճիշտ` բարի և չար հաքերների ձեռքը։
Հետազոտության արդյունքների համաձայն` Հայաստանում օգտատերերի շրջանում ամենատարածված գաղտնագիրն է «123456», երկրորդ տեղում է «4321»-ը։ Հնարավոր է` մեր բնակչությունն առանձնահատուկ սեր է տածում է թվերի նկատմամբ։ Երրորդ տեղում է «Superboy» ծածկագիրը, որն առավել հաճախ օգտագործում են տղամարդիկ։
Այստեղից հետևություն. կամ տղամարդիկ չեն կարող ավելի լավ ինչ-որ բան հորինել, կամ ուղղակի տառապում են նարցիսիզմով։ Չորրորդ և հինգերորդ տեղերը կիսում են «Gamekiller»-ը և «Sexkiller»-ը։ Վեցերորդ տեղը զբաղեցնում է ամենապարզ, ամենածույլ մարդկանց սիրելի «Asdfgh» գաղտնագիրը։
Դրանով գաղտնագրերի ցուցակը չի եզրափակվում։ «Ամենագիտակցված» գաղտնագրերը երեխաների անունները և ծննդյան օրերն են։ Մեկ այլ ծայրահեղություն է, երբ օգտատերերը վերցնում են իրենց ազգանունների առաջին տառերը և ավելացնում լրիվ անունը։ Ելնելով Գրիգորյան ազգանվան տարածվածությունից` 14-րդ տեղը զբաղեցնում է «Grig և անունը» գաղտնագիրը, օրինակ` GrigVartush։ Հայաստանում ամենատարածված գաղտնագրերի ցանկը եզրափակում են սեփական հեռախոսահամարները։
Միաժամանակ մեր երկրի իգական սեռի ներկայացուցիչները նախընտրում են ծննդյան ամսաթվերը ներառող, իսկ տղամարդիկ` «Superman», «Sexloveyou» և այլ ծածկագրերը։
Մեր տվյալներով` ամենակարճ գաղտնագիրը կազմված է 4 նիշից, իսկ ամենաերկարը` 15։
Ավելի հեշտ է կոտրել ծննդյան ամսաթվերով, հեռախոսահամարներով, ընտանիքի անդամների անուններով գաղտնագրերը։ Ավելի բարդ է կոտրել թվերի, նիշերի և տարբեր տառերի համադրությամբ կազմված գաղտնագրերը։
Որպես օրինակ` մեր աղբյուրը բերեց ամենաբարդ ծածկագրերից մեկը` «X44u66x88z887#zzC%"» և նշեց, որ լավ գաղտնագիրը պետք է կազմված լինի առնվազն 12-14 նիշից։
Հետևեք ձեր գաղտնագրերին և հիշեք, որ Հայաստանն, անցյալ տարվա տվյալներով, հայտնվել է համակարգչային վիրուսներով վարակվելու մակարդակով 20 երկրների ցուցակում` զբաղեցնելով 5-րդ տեղը Վիետնամից, Բանգլադեշից, Ռուսաստանից և Մոնղոլիայից հետո։
