ԵՐԵՎԱՆ, 11 փետրվարի- Sputnik. Հայկական ատոմային էլեկտրակայանի երկրորդ բլոկի շահագործման ժամկետի երկարացման նախագծի շրջանակում նախատեսված միջոցառումների զգալի մասն ավարտվել է։
Անցյալ տարվա հուլիսին «Հայկական ատոմային էլեկտրակայան» ՓԲԸ-ի և «Ռոսատոմ սերվիս» բաժնետիրական ընկերության միջև կնքված պայմանագրով նախատեսված աշխատանքներն իրականացրել են մի խումբ ռուսական կազմակերպություններ, որոնք հանդես են եկել որպես ենթակապալառու։
«Բանն այն է, որ միջազգային երաշխավորագրերի և գործող օրենսդրության համաձայն` մինչև ԱԷԿ-ի շահագործման ժամկետի երկարացման մասին վերջնական որոշում ընդունելն անհրաժեշտ է անցկացնել ԱԷԿ-ի երկրորդ էներգաբլոկի բաղադրիչների կառուցվածքի համակարգի և բոլոր հանգույցների համալիր հետազոտություն»,- ասում է «Հայէներգո» ընկերության նախկին տնօրեն, Խորհրդային Միության պատվավոր էներգետիկ Սպարտակ Հակոբյանը։
Այդ նախագծի շրջանակում նախատեսվել է հետազոտական աշխատանքների բավական մեծ ծավալ։ Ռեակտորի բոլոր բաղադրիչների հետազոտական աշխատանքները կատարվել են պայմանագրով նախատեսված ժամկետներում։
Ինչպես հաղորդում է «Ռոսատոմ սերվիս» ընկերության մամուլի ծառայությունը, ՀԱԷԿ-ի վիճակի հետազոտության աշխատանքներին մասնակցել է 15 կազմակերպություն, որոնց թվում` «Ատոմտեխէներգո», «Հիդրոպրես», «ՆԻԱԷՊ», «ՎՆԻԻԱԷՍ», «ՖՑՅՌԲ», «ՑԿԲՄ», «Ուժային մեքենաներ», «Օրգէնեգոստրոյ» ինստիտուտ» ընկերությունների ներկայացուցիչներ։
Ատոմային էլեկտրակայանի բաղադրիչների կառույցների համակարգի հետազոտման ներկա փուլը ներառել է շուրջ 4,5 հազար միավորի ուսումնասիրություն, նոյեմբերի 27-ից դեկտեմբերի 2-ը ՀԱԷԿ հարթակում կազմակերպվել են կատարված աշխատանքների վերաբերյալ մասնավոր հաշվետվությունների քննարկման և համաձայնեցման մասին սեմինարներ։ Սեմինարներն անցկացվել են մշակողների` «Ռուսատոմ սերվիս» ԲԸ-ի և տեխնիկական ղեկավար «Ատոմտեխէներգո» ԲԸ-ի ներկայացուցիչների մասնակցությամբ։ Արդեն կատարված աշխատանքների արդյունքում հաստատվել են 15 մասնավոր հաշվետվություններ և ստորագրվել ընդունման-հանձնման համապատասխան ակտեր։
Ինչպես պնդում է փորձագետը, փաստաթղթերի հենց այդ փաթեթը պետք է ներկայացվի ՄԱԳԱՏԷ` Մեծամորի ատոմակայանի երկրորդ բլոկի շահագործման երկարացման վերաբերյալ այդ միջազգային կազմակերպության վերջնական թույլտվությունը ստանալու համար։
Հայաստանում գործում է տարածաշրջանում ռուսական առաջին սերնդի ВВЭР-440 ռեակտորով աշխատող միակ ատոմային էլեկտրակայանը, որը գտնվում է Մեծամոր քաղաքի մոտ։
Ներկա պահին աշխատում է միայն 407,5 ՄՎտ հզորությամբ երկրորդ բլոկը։ Փորձագետների գնահատականների համաձայն` ԱԷԿ-ը կարող է գործել մինչև 2016թ.-ը, սակայն Եվրամիությունը պնդում է, որ ԱԷԿ-ի աշխատանքը պետք է դադարեցնել։
