ԵՐԵՎԱՆ, 11 փետրվարի — Sputnik. Հայաստանը երբեք որևէ բան չի անում ինչ-որ կառույցների հաճոյանալու կամ նրանց պահանջները բավարարելու համար, փետրվարի 11-ին կառավարության նիստից հետո լրագրողներին ասաց Հրայր Թովմասյանը։
«Ընտրական օրենսգրքի փոփոխությունը մեզ է պետք։ Մենք շահագրգիռ ենք, որ դիտորդական առաքելությունները շատանան և ընդլայնվեն»,- վստահեցրեց Թովմասյանը։
ԱԺ աշխատակազմի ղեկավարը ներողություն խնդրեց իր արտահայտության համար, բայց ասաց, որ այս պահին ոչ ոք չգիտի ինչ է էլեկտրոնային քվեարկությունը. մեկը լսել է, մեկը տեսել է, մեկին պատմել են։
Այն երկրներում, որտեղ վստահություն չկա ընտրության նկատմամբ, խորհուրդ է տրվում էլեկտրոնային համակարգը, որը կոչված է ապահովելու վստահության բարձրացումը։
Թովմասյանը նշեց, որ խնդրի լուծումը պետք է տեսնել հետևյալ համատեքստում` այդ համակարգերը պետք է պատրաստված լինեն միջազգային ասպարեզում հեղինակություն վայելող կազմակերպությունների կողմից, դրանք պետք է անցնեն միջազգային աուդիտ, դրանց երաշխավորը պետք է լինեն միջազգային կառույցները, որպեսզի այդ համակարգերն անձեռնմխելի լինեն։
Ըստ նրա` ոչ ոք չի կարող մուտք գործել համակարգ և ինչ-որ բան փոխել։ Եթե դրանք չգործեն, ապա նորից պետք է մտածել քվեարկությունն ավանդական թղթային եղանակով կատարելու մասին։
Թովմասյանը մանրամասնեց, որ էլեկտրոնային եղանակով քվեարկելու դեպքում անձը պետք է նույնականացվի։ Սա առաջին փուլն է, երկրորդ փուլը բուն քվեարկությունն է։
«Կան տերմինալներ, որոնց վրա նշված են թեկնածունների անունները կամ կուսակցությունը, հպվում ես մատով, նշանակում է, որ արդեն քվեարկել ես։ Կարող է զուգահեռ նաև քվեաթերթիկը տպվել»,- ասաց նա։
Երրորդ փուլը խելացի քվեատուփերն են։ Երբ քվեաթերթիկը պետք է մուտք արվի արկղ, այդ դեպքում այն ավտոմատ հաշվում է, թե ում օգտին է քվեարկվել։ Երկրորդ և երրորդ կետերի ներդրումը պայմանավորված կլինի այն հանգամանքով, թե այդ համակարգերը որքանով անցած կլինեն միջազգային աուդիտ և պատրաստված կլինեն միջազգային հեղինակություն ունեցող կազմակերպության կողմից։
«Քաղաքացին հստակ կհասկանա, որ այդ համակարգերն անձեռնմխելի են ցանկացած հաքերի համար»,- ասաց Թովմասյանը։
Նա ցավով նշեց, որ որոշ քաղաքական ուժեր չեն մասնակցում ընտրական օրենսգրքի մասին նոր օրենքի քննարկմանը։
