ԵՐԵՎԱՆ, 9 փետրվարի-Sputnik. Օմբուդսմենի պաշտոնի համար կպայքարի երեք թեկնածու` արդարադատության փոխնախարար Արման Թաթոյանը, ում առաջադրել է իշխող կոալիցիան, ընդդիմադիր «Ժառանգություն» խմբակցության ղեկավար Զարուհի Փոստանջյանը և «Ալյանս» կուսակցության խորհրդի անդամ Նարեկ Ալոյանը։ Մեկնաբանելով ստեղծված իրավիճակը` Հայաստանի առաջին օմբուդսմեն Լարիսա Ալավերդյանը նշեց, որ համակրում է բոլոր թեկնածուներին։
«Թաթոյանի դեպքում ես ոչ մի կասկած չունեմ։ Օմբուդսմենի պաշտոնի բոլոր թեկնածուներից հենց նա սերտ կապ ունի մարդու իրավունքների պաշտպանության ոլորտի հետ»,- Sputnik Արմենիա ռադիոկայանի եթերում ասաց Լարիսա Ալավերդյանը` ընդգծելով, որ Թաթոյանի առավելությունն այն է, որ նա անկուսակցական է։
Միաժամանակ խոսելով Փոստանջյանի մասին` նախկին օմբուդսմենը նրան բնութագրեց որպես «անվախ»։
«Զարուհին անվախ պայքարելու կարողություն ունի, ինչն անգնահատելի է ինձ համար»,- ասաց նա։
Այդուհանդերձ Հայաստանի մարդու իրավունքների առաջին պաշտպանը կարծում է, որ այդ մրցավազքում կհաղթի Թաթոյանը։
Հայաստանի երրորդ օմբուդսմեն Կարեն Անդրեասյանը պաշտոնը լքելու մասին հայտարարել է հունվարի 12-ին։ Անդրեասյանն իր հրաժարականը բացատրել էր հետևյալ կերպ. «Եթե 2016 թվականին էլ հենց ես մնայի օմբուդսմեն, ապա այս կարևորագույն ինստիտուտն այլևս չէր լինի այնքան արդյունավետ, որքան դարձել էր երկար տարիների չարչարանքի շնորհիվ»։
