Գոհար Սարգսյան, Sputnik
Տղամարդը պահանջում է 40 հազար դրամ կենցաղային խնդիրները լուծելու համար, հակառակ դեպքում սպառնում է ցած նետվել «Երևան մոլի» օդային կամրջից։ Այս ահազանգով ամիսներ առաջ ՏԿԱԻՆ-ում կանչ գրանցվեց, և դեպքի վայր մեկնեցին փրկարարները։ Արագ կողմնորոշվեց Զավեն Մելքոնյանը, ով անմիջապես գրպանից հանեց գումարն ու տվեց հուսահատ մարդուն։
«Նրա ձեռքում դանակ կար, նա թույլ չէր տալիս մոտենալ իրեն։ Ես նրա հետ խոսեցի և խոստացա նրան տալ 40 հազար դրամ, միայն թե հրաժարվի ինքնասպանության մտքից»,-պատմեց Զավեն Մելքոնյանը։
Մեր այն դիտարկմանը, որ ոչ շատ բարձր աշխատավարձի դեպքում հերոսություն է այդ քայլը, փրկարարը պատասխանեց կարճ ու կոնկրետ. «Մենք չենք մտածում աշխատավարձի մասին, երբ աշխատում ենք»։
Այսօր Զավեն Մելքոնյանը գոհ է ու շնորհակալ, գլուխը բարձր պահած կվերադառնա տուն. նա ՏԿԱԻՆ-ում արժանացավ «Լավագույն փրկարարի» կոչման։ Անակնկալն անբացատրելի ուրախություն է պարգևել փրկարարին։
«Եթե աշխատող մարդը չգնահատվի, կհիասթափվի։ Այս մրցանակը մեծ նշանակություն ունի ինձ համար։ Ամեն ինչ անելու եմ, որ հետագայում էլ գնահատվեմ ղեկավարների ու ժողովրդի կողմից»,-ասաց Զավեն Մելքոնյանը։
«Լավագույն լեռնափրկարար» մրցանակին արժանացած Դավիթ Հայրապետյանի հետ զրուցել չհաջողվեց. մրցանակաբաշխությունից անմիջապես հետո նա գնաց ահազանգի հետքերով` ևս մեկի կամ մի քանիսի կյանքը փրկելու։
Փետրվարի 9-ին ՀՀ ՏԿԱԻ նախարարությունում տեղի ունեցած կոլեգիայի ընդլայնված նիստը նվիրված էր ՏԿԱԻՆ 2015 թվականի գործունեության արդյունքների ամփոփմանը։ Նիստին հաջորդեց «Լավագույնն ըստ մասնագիտության» մրցանակաբաշխությունը` «Լավագույն հրշեջ-փրկարար», «Լավագույն փրկարար», «Լավագույն ջրասուզակ», «Լավագույն լեռնափրկարար» և այլ անվանակարգերով։
