ԵՐԵՎԱՆ, 9 փետրվարի — Sputnik. Երևանում բնակվող գեղանկարչուհի Լուսիկ Ագուլեցին սեփական բնակարանը վերածել է թանգարանի և այժմ ստիպված է նոր տուն տեղափոխվել։
Երևանի ավագանին փետրվարի 9-ին գումարած նիստում որոշել է ՀՀ մշակույթի վաստակավոր գործիչ, «Մովսես Խորենացի» մեդալակիր, գեղանկարչուհի և ազգագրագետ Լուսիկ Ագուլեցուն անհատույց օգտագործման իրավունքով տրամադրել բնակարան, հայտնում է Երևանի քաղաքապետարանի մամուլի ծառայությունը։
Գեղանկարչուհին իր սեփական տունը վերածել է թանգարանի, և մինչ օրս նրա ընտանիքը բնակվում է նույն այդ տարածքում։ Եվ ավագանին միաձայն կողմ քվեարկությամբ որոշել է Ագուլեցու ընտանիքի կողմից իրենց սեփականության իրավունքով պատկանող գույքն օգտագործել որպես թանգարան։
Լուսիկ Ագուլեցին ծնվել է Նախիջևանի Ագուլիս քաղաքում, այնուհետև ընտանիքով տեղափոխվել է Երևան։ Սովորել է Երևանի Փ. Թերլեմեզյանի անվան գեղարվեստի ուսումնարանում։ Հայաստանի նկարիչների միության անդամ է։ Լուսիկ Ագուլեցու կտավները գտնվում են Հայաստանի և արտերկրի թանգարաններում, մասնավոր հավաքածուներում։
