ԵՐԵՎԱՆ, 9 փետրվարի — Sputnik, Լաուրա Սարգսյան. Հայաստանն ու Շվեդիան «Եկամուտների և գույքի կրկնակի հարկումը բացառելու ու հարկերի վճարումից խուսափելը կանխելու» մասին համաձայնագիր են ստորագրել։
«Հայաստանում մի շարք շվեդական կազմակերպություններ են գործում, որոնք հիմնվում են շվեդական կապիտալի վրա, այս նկատառումով մենք ստորագրեցինք այս համաձայնագիրը, որը մեր կարծիքով`շատ կարևոր է», — մամուլի ասուլիսի ժամանակ նշել է Նալբանդյանը։
Համաձայնագիրը ստորագրվել է Հայաստանի և Շվեդիայի ԱԳՆ ղեկավարներ Նալբանդյանի ու Վալստրյոմի հանդիպման շրջանակում։
«Այս համաձայնագիրը կհեշտացնի Հայաստանում բնակվող շվեդ քաղաքացիների կյանքը», — համատեղ մամուլի ասուլիսի ժամանակ հայտնել է Վալստրյոմը։
Կողմերը քննարկել են տարածաշրջանային անվտանգության, հայ-շվեդական հարաբերությունների դինամիկ զարգացման հարցերը, ընդգծել են առևտրի, տնտեսության, մշակույթի, կրթական ու առողջապահական ոլորտներում համագործակցության խորացման կարևորությունը։
Նախարար Նալբանդյանը նշել է, որ հարաբերություններն ակտիվացել են Երևանում և Ստոկհոլմում (2014 թվականին) դեսպանատների բացումից հետո։ Իսկ նախարարների հանդիպման շուրջ պայմանավորվածությունը ձեռք էր բերվել անցյալ տարվա դեկտեմբերին Նալբանդյանի` Բրյուսել կատարած այցի ժամանակ։ Երկկողմ հանդիպման ժամանակ Հայաստանի և Շվեդիայի արտգործնախարարները քննարկել էին միջազգային կազմակերպություններում երկկողմ համագործակցության խորացմանը վերաբերող հարցերը։
