ԵՐԵՎԱՆ, 9 փետրվարի — Sputnik. Ստոկհոլմի ոստիկանությունը փետրվարի 9-ին կալանավորել է 14 մարդու, որոնց կասկածում է Ստոկհոլմից 50 կմ հեռավորության վրա գտնվող Նյունեսհամ քաղաքում փախստականների ապաստարանի վրա հարձակում նախապատրաստելու մեջ, հայտնում է ՌԻԱ Նովոստին` հղում անելով Sveriges radio-ին (Շվեդիայի ռադիոն)։
Ոստիկանները կասկածյալներին կալանավորել են հարձակման մասին հաղորդագրություն ստանալուց հետո։ Հարձակումների ենթադրյալ վայրում նրանք ստուգել են ավտոմեքենաները։
«Ստուգումների համար կանգնեցված ավտոմեքենաներում հայտնաբերվել են երկաթյա ձողեր, կացիններ ու դանակներ», — ռադիոյին ասել է Ստոկհոլմի ոստիկանության ներկայացուցիչ Լարս Ալվարշոն։
«Մենք հիմքեր ունենք ենթադրելու, որ խոսքն ատելության հողի վրա իրականացվող հանցագործության մասին է, ինչն ավելի է լրջացնում իրավիճակը», — պարզաբանել է ոստիկանության ներկայացուցիչը։
Կալանավորվածները 20-35 տարեկան են, նրանց թվում նաև Լեհաստանի քաղաքացիներ կան, որոնք ապրում են Շվեդիայում։
