ԵՐԵՎԱՆ, 9 փետրվարի — Sputnik. Ռուս-թուրքական հարաբերությունների կարգավորումից հետո թուրքական բիզնեսը չի կարողանա հեշտությամբ վերադառնալ ռուսական շուկա, քանի որ նրա տեղն արդեն զբաղեցրած կլինեն մյուս երկրները, ՌԻԱ Նովոստիին է հայտնել Անկարայում ՌԴ դեսպան Անդրեյ Կարլովը։
ՌԴ-ի և Թուրքիայի հարաբերությունները սրվել են 2015 թվականի նոյեմբերից 24-ից հետո, երբ թուրքական ՌՕՈՒ-ն խոցել էր ռուսական Սու-24 ինքնաթիռը, որը մասնակցում էր Սիրիայում գործող ահաբեկիչների դեմ ուղղված գործողություններին։ Օդաչուներից մեկը զոհվել էր, մյուսը կարողացել էր փրկվել։ Ռուսաստանի նախագահ Վլադիմիր Պուտինն այս դեպքը «թիկունքից հասցված հարված» էր որակել և հրամանագիր ստորագրել` Թուրքիայի նկատմամբ հատուկ տնտեսական սահմանափակումներ կիրառելու մասին։
«Մենք Թուրքիայից գնում էինք շուրջ 1 մլրդ դոլարի գյուղմթերք, և մեր առևտրի ծավալներն այդ ոլորտում անդադար ավելանում էին։ Այսօր թուրքական գյուղմթերքը հայտնվել է սահմանափակված ապրանքների ցանկում։ Անգամ մեր հարաբերությունների կարգավորման դեպքում մի շարք թուրք մատակարարների համար շատ դժվար կամ ընդհանրապես անհնար կլինի վերադառնալ ռուսական շուկա, քանի որ նրանց արդեն փոխարինել են եգիպտական, իսրայելական, ադրբեջանական ու իրանական մատակարարները։ Սրանց շարքում կան նաև արտասահմանյան ընկերություններ, որոնք ցանկանում են այդ տեղը զբաղեցնել», — ասել է Կարլովը։
Նրա խոսքով` թուրք գործարարները քաջ գիտակցում են, թե ինչու են նրանք ՌԴ-ում կորցրել իրենց պայմանագրերն ու միլիարդավոր դոլարները։
«Ինքնաթիռի միջադեպից անմիջապես հետո Թուրքիայի կառավարության կողմից «լավատեսական գնահատականներ» էին հնչում` երկրի տնտեսությունը կկորցնի 1 մլրդ դոլար կամ գուցե 2-3… Սակայն Turkish Social, Economic and Political Research Foundation հետազոտական ինստիտուտի վերջին տվյալների համաձայն` Ռուսաստանի հետ հարաբերությունների վատթարացումից հետո Թուրքիան կկորցնի 11 մլրդ դոլար։ Չի կարելի մեղադրել մեզ, որ Ռուսաստանը չափազանցնում է իրավիճակը. սրանք թուրքական կողմի թվերն են», — ավելացրել է Կարլովը։
