ԵՐԵՎԱՆ, 9 փետրվարի —Sputnik. Գվինեթ Փելթրոուն ցուցմունքներ է տվել Լոս Անջելեսի դատարանում և հայտնել, որ տղամարդը պարբերաբար իրեն նվերներ, սեքս-խաղալիքներ և ամուսնության խոստումներով նամակներ է ուղարկում։
Դերասանուհին առաջին անգամ օգնություն է խնդրել 1999 թվականին, երբ պոռնոգրաֆիկ բնույթի տեսանյութով, սեքս-խաղալիքներով ու նամակներով լի ծանրոցներ է ստացել ոմն Դանթե Սոյուից։ Սոյուն նամակներում գրել է, որ ուզում է Փելթրոուի «մեղքերը մաքրել»։ 2000 թվականին դատարանը Սոյուին մեղավոր չի ճանաչել հոգեկան խանգարման պատճառով և նրան մի քանի տարով ուղարկել է հատուկ կլինիկայում բուժվելու։ 2015 թվականին կրքոտ երկրպագուն ձերբակալվել է, քանի որ կրկին սկսել է նամակներ գրել Փելթրոուին։
Դերասանուհին ցուցմունքներ է տվել 66 ծանրոցի առնչությամբ: Նվերների թվում են Սուրբ ծննդյան տոնի առթիվ ուղարկված ականջօղերը, կրոնական բովանդակությամբ գրքերը, նամակները, որոնցում Սոյուն գրում է, թե ուզում է ամուսնանալ Փելթրոուի հետ:
Մեղադրյալի փաստաբանը հայտարարել է, որ Սոյուն պարզապես նամակներ է գրել դերասանուհուն` փորձելով ծառայություն մատուցել, և նրա նամակագրությունը պոռնոգրաֆիկ բովանդակություն չունի: 66-ամյա Սոյուն իր մեղքը չի ընդունում:
