ԵՐԵՎԱՆ, 3 փետրվարի — Sputnik. S7 ավիաընկերության` Մոսկվա- Թբիլիսի չվերթն իրականացնող ինքնաթիռը, որն իբր սկսել էր այրվել Դոմոդեդովո օդանավակայանում, Վրաստանի մայրաքաղաք է ժամանել 18։00-ին, հայտնում է Թբիլիսիի Շոթա Ռուսթավելու անվան միջազգային օդանավակայանի մամուլի ծառայությունը։
Ավելի վաղ ականատես ուղևորները հայտնել էին, որ ավիաընկերության ինքնաթիռը բռնկվել է։ Մոսկվայի աղբյուրն էլ հայտնել էր, որ տեխնիկական անսարքությունների պատճառով ուղևորները մեկ այլ ինքնաթիռ են տեղափոխվել, որը թռիչքի է դուրս եկել ուշացումով։
«Ես` որպես օդանավակայանի ներկայացուցիչ, կարող եմ ասել, որ S7-ի ինքնաթիռն ուշացել է կես ժամով։ Պատճառների մասին ավելի լավ կլինի` խոսեք S7-ի ներկայացուցիչների հետ»,- ասել է Թբիլիսիի օդանավակայանի մամուլի ծառայության աշխատակիցը։
S7 ավիաընկերության վրաստանյան ներկայացուցչությունը որևէ մեկնաբանություն չի տվել, իսկ Ռուսաստանում գտնվող պաշտոնական ներկայացուցչությունը հերքել է ինքնաթիռի շարժիչի բռնկման մասին տեղեկությունը։
