ԵՐԵՎԱՆ, 3 փետ, Sputnik. Զիկա վիրուսի տարածման հավանականությունը Հայաստանում շատ ցածր է, այսօր Ազգային ժողովի հարցուպատասխանի ժամանակ ասաց ՀՀ առողջապահության նախարար Արմեն Մուրադյանը:
«Նման տեսակի (վիրուս տարածող) մոծակներ Հայաստանում չկան բնակլիմայական պատճառով: Մեզ մոտ Զիկա վիրուսի տարածման հավանականությունը շատ ցածր է», — ասաց Մուրադյանը:
Նրա խոսքով` վիրուսի տարածումը հավանական է այն դեպքում, եթե մարդիկ վարակվեն այն երկրներում, որոնք նշել է Առողջապահության համաշխարհային կազմակերպության կողմից:
Նախարարը ավելացրեց նաև, որ հիմնականում վտանգ է սպառնում հղիներին, և խորհուրդ տվեց հղիության շրջանում չմեկնել այդ երկրներ:
Մուրադյանը անդրադարձավ նաև վերջին շրջանում Հայաստանում տարածված սուր շնչառական հիվանդությունների խնդրին, մասնավորապես` խոզի գրիպի հետ կապված իրավիճակին: Նա նշեց, որ Հայաստանում հիվանդության դեպքերի շուրջ 50% նվազում կա:
«Ընդհանուր առմամբ գրանցվել է մահվան 19 դեպք, գրեթե բոլոր դեպքերում եղել են ուղեկցող հիվանդություններ, և մահվան պատճառ է դարձել նաև այն, որ հիվանդները ուշ են դիմել բժիշկներին», — նշեց նախարարը:
Նա ընդգծեց, որ բժիշկներն ամեն ջանք գործադրել են նրանցից յուրաքանչյուրի կյանքը փրկելու համար:
Նրա խոսքով` մինչ այս պահը բոլոր դեղամիջոցները հիվանդներին տրվել են անվճար, և այդ ուղղությամբ չարաշահումներ չեն եղել:
