ԵՐԵՎԱՆ, 2 փետրվարի — Sputnik. Զիկա վիրուսի պատվաստանյութը մշակելու համար 3-5 տարի կպահանջվի, հայտարարել է Բրազիլիայի նախագահի աշխատակազմի ղեկավար Ժակ Վագները։
Առողջապահության համաշխարհային կազմակերպությունը հայտարարել է, որ Զիկա վիրուսը սպառնալիք է, որը կարող է գլոբալ ծավալների հասնել, քանի որ այն շատ արագ է տարածվում, և Բրազիլիայում արդեն հազարավոր դեպքեր են գրանցվել։
Վագների խոսքով` բրազիլացի հետազոտողները պատվաստանյութը մշակում են ամերիկացի գիտնականների հետ համատեղ։ «Եթե մեր բախտը բերի, դա կտևի երեք տարի։ Սակայն այն կարող է երեքից հինգ տարի տևել»,- ասել է Վագները։
Ավելի վաղ տեղեկություն էր հրապարակվել, որ ամերիկացի և կանադացի գիտնականները Զիկա վիրուսի պատվաստանյութ են մշակում, որի նմուշները խիստ անհրաժեշտության դեպքում կարող են հասանելի դառնալ մինչև տարեվերջ։
Զիկա վիրուսը մարդուց մարդուն չի փոխանցվում, տարածվում է մոծակների միջոցով:
