ԵՐԵՎԱՆ, 27 հունվարի — Sputnik. Հատուկ ստեղծված աշխատանքային խմբի որոշման համաձայն` Գյումրու կենդանաբանական այգու առյուծները կտեղափոխվեն Արարատի շրջանի Ուրցաձոր գյուղ, հայտնում է Հայաստանի բնապահպանության նախարարության մամուլի ծառայությունը։
27 հունվարի 2016, 10:51
Աշխատանքային խմբի անդամ, Վայրի բնության և մշակութային արժեքների պահպանության հիմնադրամի նախագահ Ռուբեն Խաչատրյանը տեղեկացրել է, որ հիմնադրամի Ուրցաձորի տեղամասում երկշաբաթյա ժամկետում կավարտվեն վերականգնողական կենտրոնի կառուցման աշխատանքները, որտեղ էլ ժամանակավորապես նախատեսված է տեղափոխել Գյումրու կենդանաբանական այգու երեք առյուծին:
Նախարարությունում նաև հայտնել են, որ Ուրցաձորի ապաստարանը ժամանակավոր կացարան է լինելու գիշատիչների համար։ Այժմ կենդանիների պաշտպանության հիմնադրամների հետ բանակցություններ են անցկացնում և քննարկում են առյուծներին Արևմտյան Եվրոպա տեղափոխելու հնարավորությունը։
Ավելի վաղ նույն Գյումրու մասնավոր կենդանաբանական այգու արջերը` Մաշան ու Միշան, տեղափոխվել էին Երևանի կենդանաբանական այգի, որտեղ վերականգնողական բուժում են անցնում։ Համապատասխան փաստաթղթերի ձևակերպումից հետո արջերին կտեղափոխեն Ռումինիա։
