ԵՐԵՎԱՆ, 27 հունվարի- Sputnik. Առաջիկա 20 տարիների ընթացքում ՀՀ առաջին նախագահի կյանքին և աշխատունակությանը որևէ վտանգ չի սպառնում, այս մասին նշվում է ՀՀ առաջին նախագահ Լևոն Տեր-Պետրոսյանի գրասենյակի տարածած հաղորդագրությունում:
Հունվարի 26-ին Լևոն Տեր-Պետրոսյանը Գլենդեյլի Մեմորիալ հիվանդանոցում հետվիրահատական ստուգման է ենթարկվել բուժող բժիշկներ Պետար Վուկասինի և Գալուստ Յուքարի կողմից:
«Վերջիններս գոհունակություն են հայտնել Տեր-Պետրոսյանի ապաքինման ընթացքի վերաբերյալ և հավաստիացրել, որ առաջիկա 20 տարիների ընթացքում ՀՀ առաջին նախագահի կյանքին և աշխատունակությանը որևէ վտանգ չի սպառնում»,- ասված է հաղորդագրությունում:
Տեր-Պետրոսյանը պատրաստվում է Երևան վերադառնալ 2-3 շաբաթից։
