ԵՐԵՎԱՆ, 19 հունվարի — Sputnik. Վրաստանի Սամցխե-Ջավախեթիում մարդու իրավունքների պաշտպանի գրասենյակում վերակազմակերպչական աշխատանքների արդյունքում պաշտոնից ազատվել է գրասենյակի երկու աշխատակից՝ Արմեն Մարանգոզյանն ու Սեդա Մելքումյանը:
«Դեկտեմբերի 17-ին մեզ հայտնեցին, որ մեկ ամիս անց տարածաշրջանային դեպարտամենտում վերակազմակերպում է անցկացվելու, և այդ կապակցությամբ իրավաբաններ են անհրաժեշտ: Այդ ժամանակ էլ մրցույթ հայտարարվեց իրավաբանի թափուր պաշտոնի համար: Մեկ ամիս անց` արդեն հունվարի 17-ին, մեզ տեղեկացրին, որ մենք ազատվում ենք աշխատանքից», — Sputnik Արմենիա պորտալի թղթակցի հետ զրույցում հայտնեց Վրաստանի Սամցխե-Ջավախեթի շրջանի օմբուդսմենի աշխատակազմի նախկին ներկայացուցիչ Արմեն Մարանգոզյանը:
Մարդու իրավունքների պաշտպանի գրասենյակում ներկա պահին վերակազմավորման աշխատանքներ են ընթանում. որոշ աշխատակիցներ կրճատվեցին, սակայն կան նաև նոր նշանակումներ:
«Քանի որ տարածաշրջանային գրասենյակը դարձել է տարածաշրջանային դեպարտամենտ, փոխվել են պահանջներն ու պայմանները: Գլխավոր պահանջը եղել է այն, որ գրասենյակի բոլոր աշխատակիցները պետք է իրավաբանական կրթություն ունենան», — Sputnik Արմենիայի հետ զրույցում ասաց Վրաստանի օմբուդսմենի տարածաշրջանային դեպարտամենտի ղեկավար Թեյմուրազ Քորիձեն: Ինչպես պարզաբանեց Քորիձեն, այսուհետ գրասենյակն իր հարցերն անձամբ է լուծելու, այլ ոչ թե Թբիլիսիի միջոցով, ինչպես նախկինում էր:
Կադրային փոփոխություններ են տեղի ունեցել 4-5 գրասենյակներում: Նա նաև ավելացրեց, որ Մարանգոզյանի ու Մելքումյանի նկատմամբ աշխատանքի կատարման առումով որևէ դժգոհություն չի եղել: Պարզապես նոր պահանջներ ու պայմաններ են ներդրվել:
«Մենք շարունակում ենք իրավաբանական կրթությամբ նոր աշխատակիցներով համալրել գրասենյակը, որոնք տիրապետելու են ինչպես վրացերեն, այնպես էլ հայերեն լեզուներին», — ասաց նա:
Վրաստանի ժողովրդական պաշտպանի գրասենյակը Սամցխե-Ջավախեթիի շրջկենտրոն Ախալքալաքում բացվել է հինգ տարի առաջ: Գրասենյակի նպատակը տարածաշրջանում մարդու իրավունքների ոլորտում իրավիճակի ուսումնասիրումը և քաղաքացիական հասարակության ներկայացուցիչների համար տարբեր կրթական ծրագրերի անցկացումն է:
