Լաուրա Սարգսյան, Sputnik.
Այս տարվա հունվարին Վրաստանի նախագահ Գեորգի Մարգելաշվիլին ստորագրել է երկրի Ընտրական օրենսգրքում շտկումներ կատարելու օրինագիծը, որոնք նախաձեռնել է «Վրացական երազանք» կուսակցության խորհրդարանական մեծամասնությունը:
Դրանք վերաբերում են մեծամասնական ընտրատարածքներին, որոնք այսուհետև մեծանալու են և մինչև 2016թ.-ի խորհրդարանական ընտրությունները պետք է ձևավորվեն նոր կարգով: Ստորագրելով շտկումները՝ Մարգելաշվիլին ընդգծել է, որ դրանք ընդամենը փոփոխություններ են, ոչ թե բարեփոխումներ: Եթե նախկինում տարբեր տարածքներում բնակչության քանակը տարբեր էր ու տատանվում էր 6000-ից 50 000-ի միջև, ապա շտկումներով նախատեսվում է, որ ընտրատարածքը պետք է կազմված լինի միջինը 47 000 ընտրողից: Եվրոպայի խորհրդի վենետիկյան հանձնաժողովի երաշխավորագրերի համաձայն, շեղումը նշված թվից կարող է լինել մինչև 10 տոկոսի չափով:
«Միավորելով Ախալքալաքը և Նինոծմինդան՝ մենք ստանում ենք մեկ մեծամասնական պատգամավոր, իսկ մյուս շրջաններում ապրում են այլ ազգային փոքրամասնություններ, որոնցից ընտրվելու է երեքական պատգամավոր, իսկ մեզ մոտ, համապատասխանաբար, կլինի մեկ պատգամավոր: Մենք ՝ Ջավախքի հայերս, մեզ վիրավորված ենք զգում»,- ասել է Պետրոսյանը՝ ելույթ ունենալով գործընկերների առջև:
Այսօրվա դրությամբ Վրաստանի խորհրդարանում կա երկու մեծամասնական պատգամավոր Ախալքալաքի և Նինոծմինդայի ընտրական շրջաններից: Ախալքալաքի բնակչությունը կազմում է 61 000, իսկ Նինոծմինդայինը՝ 34 000: Հատկանշական է, որ անցած տարվա դեկտեմբերին Վրաստանի խորհրդարանում առաջին ընթերցման ժամանակ շտկումը չի վերաբերել Ախալքալաքի և Նինոծմինդայի շրջաններին: Այդ շտկումը ներառվել է օրենքի երկրորդ ընթերցման ժամանակ։ Վրաստանում գործում է խառն ընտրական համակարգ, որով խորհրդարանի 150 անդամներից 77-ն ընտրվում են համամասնական համակարգով, իսկ 73-ը՝ մեծամասնական:
Վրաստանի խորհրդարանում հայ համայնքը ներկայացնում է երեք պատգամավոր՝ Սամվել Պետրոսյանն Ախալքալաքից, Էնզել Մկոյանը Նինոծմինդայից, որոնք 2012թ.-ին առաջադրվել են Միխեիլ Սահակաշվիլու «Միասնական ազգային շարժում» կուսակցությունից, ինչպես նաև Ռուսլան Պողոսյանը, որն ընդգրկվել է «Վրացական երազանք» կոալիցիայի նախընտրական դաշինքի ցուցակում Վրաստանի նախկին վարչապետ Բիձինա Իվանիշվիլու կողմից:
«Ամեն ինչ կախված է նրանից, թե ինչպես կներկայացվեն տեղի հայ համայնքի շահերը: Չէ՞ որ նույն վենետիկյան հանձնաժողովի առաջարկով կարող են բացառություններ լինել բարձրադիր շրջանների համար (օրինակ` Սվանեթիի համար), որոնց միավորումը կարող է բարդություններ առաջացնել, ինչպես նաև էթնիկ փոքրամասնություններով խիտ բնակեցված շրջանների համար»,- Sputnik Արմենիայի հետ զրույցում նշեց Վրաստանի հարցերի փորձագետ, Հայաստանի պետական կառավարման ակադեմիայի տարածաշրջանային հետազոտությունների կենտրոնի գիտաշխատող Ջոննի Մելիքյանը:
Փորձագետի խոսքով՝ տեղամասերի մեծացումը կարող է լինել այն բանի հաշվին, որ Ախալքալաքից և Նինոծմինդայի հարակցի շրջաններից որոշ գյուղեր կանցնեն Նինոծմինդային: «Նինոծմինդայի մեծացումով համայնքը կարող է պահպանել խորհրդարանում երկու մեծամասնական պատգամավորներին: Թեև ընդդիմադիր կուսակցությունները պնդում են, որ մինչև 2016թ.-ի ընտրությունները մեծամասնական համակարգը վերացվի, այնուամենայնիվ իշխող կոալիցիան համաձայնել է ընդունել այդ առաջարկը միայն 2016թ.-ի ընտրություններից հետո»:
Այսպիսով, մեծամասնական բաղադրիչը կարող է չեղյալ հայտարարվել մինչև 2020թ.-ը: «Այդ համակարգն ունեցող շրջաններին չվնասելու համար կստեղծվի որոշակի կուսակցական ցուցակ: Ենթադրվում է, որ յուրաքանչյուր կուսակցություն ներկայացուցիչներ կունենա երկրի տարբեր շրջաններից, որոնք առաջադրված կլինեն տեղի բնակչության կողմից»,- ասաց Մելիքյանը:
