ԵՐԵՎԱՆ, 19 հունվարի — Sputnik. Հայաստանում դեղամիջոցներն արդեն ավելի մատչելի կլինեն, և գնորդը հնարավորություն կստանա ձեռք բերել ոչ միայն այն դեղահաբերը, որոնք նրանց առաջարկում են, այլ այն դեղամիջոցները, որոնք իրենց գրպանին հարմար են:
1998 թվականին ընդունված «Դեղերի մասին» օրենքը հնացել էր ու չէր համապատասխանում շուկայի արդի պահանջներին: Նոր օրենքը, որը մշակվում էր մի քանի տարի, արդեն ընդունվել է առաջին ընթերցմամբ: Առողջապահության նախարարության ներկայացուցիչների խոսքով՝ դրա նպատակն է զգալիորեն բարձրացնել դեղերի ֆիզիկական ու ֆինանսական մատչելիությունը, բնակչությանն ապահովել արդյունավետ ու անվտանգ դեղերով:
«Քաղաքացիները կկարողանան ձեռք բերել հայրենական արտադրության դեղամիջոցներ, որոնք որակով ոչնչով չեն զիջում արևմտյան արտադրողների արտադրանքին, սակայն ավելի մատչելի են», — լրագրողներին ասաց Հայաստանի դեղ արտադրողների ու ներկրողների միության նախագահ Սամվել Զաքարյանը:
Նա հայտնեց, որ 20115 թվականի առաջին կիսամյակում դեղերի արտադրությունն ավելացել է 32 տոկոսով, իսկ արտահանումն ավելացել մոտավորապես 26 տոկոսով: Զաքարյանը նշեց, որ տեղական դեղերի արտադրությունը վերջին ութ տարվա ընթացքում աճել է 50-55 տոկոսով, ընդ որում, նա դժվարացավ նշել կոնկրետ ծավալները:
Ներկա պահին Հայաստանի տարածքում 43 ներկրող կազմակերպություն է գործում: Ինչպես պնդում է փորձագետը, Հայաստանի դեղագործական շուկայում մենաշնորհ չկա, թեև կարծիք կա, որ դեղերի ներկրումը մեկ մարդու է պատկանում:
«Խոշոր ու հայտնի կազմակերպություններ «Նատալի Ֆարմն» ու «Ալֆա ֆարմը» մոնոպոլիստներ չեն, նրանք պարզապես առաջատար դիրք են զբաղեցնում այս բնագավառում: Օրինակ` լինում է այնպես, որ փոքր դեղագործական ընկերությունը ներկրում է որևէ կոնկրետ մեկ ապրանքանիշի դեղամիջոց, որը խոշոր ներկրողները չեն բերում », — ասաց Զաքարյանը:
Ընդ որում, ինչպես Sputnik Արմենիային հայտնեցին առողջապահության նախարարությունից, տեղական արտադրանքի դեղամիջոցների պահանջարկը դեղերի ողջ իրացման ծավալի 5-10 տոկոսն է կազմում: Շատերը չեն վստահում հայրենական արտադրողներին, սակայն Զաքարյանն ավելացրեց, որ որակով դրանք չեն զիջում արտասահմանյաններին։
Հայաստանի առողջապահության նախարար Արմեն Մուրադյանի գնահատմամբ՝ Հայաստանի շուկա ամեն տարի ստացվում է 110 մլն դոլար ընդհանուր արժողությամբ շուրջ 43 մլն դեղամիջոց:
