ԵՐԵՎԱՆ, 20 նոյեմբերի-Sputnik. Հակաբիոտիկները ոչնչացնում են ոչ թե վիրուսները, այլ բակտերիաները, հետևաբար գրիպի ու փորացավի դեպքում հակաբիոտիկ օգտագործելն արգելվում է:
Հակաբիոտիկները մարդու միջին կյանքը երկարացրել են 20 տարով: Եթե ժամանակին դրանք կիրառվում էին լուրջ հիվանդությունները բուժելու համար, ապա այսօր մենք դրանց հետևից դեղատուն ենք շտապում առաջին իսկ փռշտոցի դեպքում:
«Մարդկանց ասում ենք, որ այդ դեղամիջոցների հետ խաղ անել չի կարելի, ու դրանք պետք է ընդունել բժշկի նշանակմամբ, բայց հաճախ մեզ չեն լսում»,-պատմեց Երևանի դեղատներից մեկի աշխատակից Տաթևիկը:
Երբ մենք անտեղի, առանց բժշկի նշանակման ու ճիշտ դոզավորման հակաբիոտիկ ենք օգտագործում, ապա օրգանիզմի «չարագործ» մանրէները դեղի հանդեպ դիմակայուն են դառնում:
«ԱՀԿ Եվրոպական տարածաշրջանի 29 երկրում տարեկան 400 հազար մարդու մոտ դեղակայունության դեպք է հայտնաբերվում: Նրանցից մոտ 25 հազարին փրկել չի հաջողվում: Ցավալին այն է, որ մանրէների կայուն ձևերն այնքան արագ են զարգանում, որ մասնագետները չեն հասցնում նոր դեղահաբեր ստեղծել: Վերջին տարիներին բժշկագիտության ոլորտ ընդամենը 2 հակաբիոտիկ է մտել»,- պատմեց ՀՀ ԱՆ հակամանրէային դեղերի նկատմամբ կայունության դեմ պայքարի ազգային պատասխանատու Քրիստինե Գյուրջյանը:
Ի դեպ, դեղակայունությունը ժառանգաբար մի մանրէից փոխանցվում է մյուսին։
«Հակաբիոտիկները նշանակում ենք մեծ զգուշավորությամբ: Նույնիսկ Պենիցիլինից նկարագրված են այնպիսի ալերգիկ ռեակցիաներ, որոնք ի զորու են սպառնալ հիվանդի կյանքին»,- տեղեկացրեց մանկաբույժ Սերգեյ Սարգսյանը:
Մեր զրուցակիցը չի կարող մոռանալ 20 տարի առաջ Երևանի 10 պոլիկլինիկաներում իրականացրած իրենց մոնիթորինգը: Սուր շնչառական խնդիրներով բուժհաստատություն այցելած «երեխաների 97 տոկոսին նշանակում էին հակաբակտերիալ դեղամիջոց»:
Առողջապահության նախարարությունում մենք տեղեկացանք, որ այսօր բժիշկների համար այս թեմայով կազմակերպվում են վերապատրաստման դասընթացներ:
Տեղեկացնենք նաև, որ առողջապահական գերատեսչությունն Ազգային ժողով է ներկայացրել «Դեղերի մասին» նոր օրենքը, ըստ որի` դեղատներում հակաբիոտիկները պետք է վաճառվեն դեղատոմսով, հակառակ դեպքում վարչական տույժ կկիրառվի:
Գոհար Սարգսյան
