ԵՐԵՎԱՆ, 19 հունվարի — Sputnik, Դավիթ Գալստյան. Քսանվեց տարի առաջ թշնամու գնդակից զոհվեց անկախության համար ակտիվ պայքար մղող, Հայաստանի ազգային հերոս Մովսես Գորգիսյանը:
Երևանի մանկավարժական համալսարանի ռեժիսուրայի բաժինն ավարտելուց ու Գորիսի դրամատիկական թատրոնում երկու տարի աշխատելուց ընդամենը երեք տարի անց` 1987 թվականին, Գորգիսյանը դարձավ «Ազգային ինքնորոշում» միավորման անդամ, հիմնադրեց ու ստանձնեց «Հրապարակայնություն» և «Հայրենիք» ամսագրերի խմբագրի պաշտոնը:
Sputnik Արմենիա պորտալի հետ զրույցում «Ազգային ինքնորոշում» միավորման ղեկավար Պարույր Հայրիկյանը նշեց, որ Գորգիսյանը մեծ հումորի զգացում ուներ, ուժեղ էր ոգով, անկեղծ էր ու ազնիվ:
«Երկու Մովսես կար՝ մեկը միլիոնավոր անձանց նման ընտանիքին նվիրված անձնավորություն, մյուսը՝ ազգային գործիչ, ԽՍՀՄ-ում առաջին այլընտրանքային ժողովրդավարական կազմակերպության հիմնադիրներից մեկը», — ասաց Հայրիկյանը:
Նրա խոսքով՝ Մովսեսը բազմակողմանի զարգացած մարդ էր, մասնագիտությամբ ռեժիսոր լինելով` իր գիտելիքներն ու հմտությունները հմտորեն կիրառում էր քաղաքական ու ազգային-ազատագրական գործունեության մեջ:
«Իմ համախոհների մեջ նա ամենատաղանդավորն էր, եթե նա հասկանում էր, որ որևէ բան է պետք գործի համար, մի քանի շաբաթվա ընթացքում այդ ոլորտի պրոֆեսիոնալ էր դառնում», — ասում է Հայրիկյանը:
1988 թվականի մայիսի 28-ին Գորգիսյանը Ազատության հրապարակում առաջին անգամ բարձրացրեց եռագույնը:
Նրան վեց անգամ ձերբակալել են: Ընկերները բազմիցս նշել են, որ հենց ակտիվ գործունեության շնորհիվ էր նա կարողացել մարդկանց հավատն ամրապնդել վաղվա նկատմամբ, անկախության գաղափարի նկատմամբ:
«Նրա պայքարը երազանք չէր, այլ` իրականություն: Մովսեսը համոզված էր, որ շատ մոտ է այն պահը, երբ դառնալու է հայոց պետականության վերականգնման ու հայոց աշխարհի ստեղծման մասնակիցը», — ասում է նրա այրին՝ Ռուզաննա Գորգիսյանը:
Նա պայքարում էր ու պայքարի կոչ անում` կարծելով, որ «այն ժողովուրդը, որը չի ձգտում անկախության և համակերպվել է իր ստրկական վիճակին, որպես ազգ սպառել է իրեն ու այլևս գոյություն չունի»:
1990 թվականի հունվարի 18-ին կտրուկ սրվեց իրավիճակը Նախիջևանի սահմանակից Արարատի շրջանում. ադրբեջանական կողմն անդադար գնդակոծում էր հայկական մոտակա գյուղերը: Մովսեսը ջոկատով գրոհեց բարձունքի վրա տեղակայված թշնամու կրակակետերը, որոնք լռեցվեցին, սակայն մարտում ընկավ նաև ինքը։
Մովսես Գորգիսյանը թաղված է Ծիծեռնակաբերդում։
