ԵՐԵՎԱՆ, 14 հունվարի — Sputnik. ՀՀ առողջապահության նախարարությունը ներկայացնում է, թե որոնք են գրիպի հիմնական նշանները, որոնց առկայության դեպքում պարտադիր պետք է հրավիրել մանկաբույժի կամ ընտանեկան բժշկի կամ էլ երեխային տանել առաջնային բուժհիմնարկ՝ պոլիկլինիկա/առողջության կենտրոն։
Պետք է բժշկի դիմել, եթե երեխայի մոտ նկատվում է ջերմության բարձրացում` 38 աստիճանից բարձր, հազ, հարբուխ, կոկորդի ցավ, գլխացավ, մկանացավ, փորլուծություն և փսխում:
Եթե երեխան բժշկի հսկողությամբ բուժում է ստանում տանը, ապա պետք է երեխային տալ առատ հեղուկներ՝ ջուր, թեյ, հյութեր, կոմպոտ (ոչ շատ քաղցր), կարևոր է հսկել մարմնի ջերմաստիճանը և ժամանակին տալ ջերմիջեցնող դեղամիջոցներ՝ պարացետամոլ կամ նուրոֆեն (բժիշկը կարող է նշանակել նաև այլ դեղեր), երեխաներին չի կարելի տալ ասպիրին և/կամ ասկոֆեն, հարկավոր է մշտապես օդափոխել սենյակը, պահել երեխային չափավոր տաք պայմաններում,պետք է պահպանել հիգիենայի կանոնները, հաճախակի լվանալ ձեռքերը:
Ե՞րբ է պետք երեխային անմիջապես տեղափոխել հիվանդանոց
Երեխային անհապաղ պետք է տեղափոխել հիվանդանոց, եթե վերը ներկայացված հիմնական նշաններին ավելանում են քնկոտությունը, երեխան չի կարողանում խմել կամ կուրծք ուտել, շարունակաբար հրաժարվում է հեղուկներ խմելուց, երեխան փսխում է յուրաքանչյուր կերակրումից կամ հեղուկ ընդունելուց հետո, առկա են ցնցումներ, առկա է հաճախացած և/կամ դժվարացած շնչառություն, կապտուկ, երեխան անսովոր գերգրգռված է, առկա է ծանր ջրազրկում, եթե երեխայի տարիքը 2 ամսականից փոքր է, երեխան ունի որևէ այլ քրոնիկ հիվանդության սրացում:
