Սիմոնյան. Հայաստանի հավակաքանի թիմային ոգին և կենտրոնացման կորուստը

ԵՐԵՎԱՆ, 8 հունվարի- Sputnik. Ֆուտբոլի Հայաստանի հավաքականը կոլեկտիվում երբեք խնդիրներ չի ունեցել, sportsdaily.ru-ին տված հարցազրույցում ասել է շվեյցարական «Ցյուրիխի» կիսապաշտպան Արտյոմ Սիմոնյանը։ Հայկական թիմը չափազանց անհաջող է անցկացրել Եվրոպայի առաջնության ընտրական մրցաշարը` խմբում զբաղեցնելով վերջին տեղը և ութ խաղից հետո հավաքելով ընդամենը երկու միավոր։ Դա է եղել գլխավոր մարզչին փոխելու պատճառը։ Դեկտեմբերի 10-ին ազգային հավաքականի նոր մարզիչ է դարձել Վարուժան Սուքիասյանը։

«Մենք թիմում երբեք խնդիրներ չենք ունեցել, քանի որ Հայաստանի հավաքականը միշտ հայտնի է եղել իր կոլեկտիվով։ Բայց կարևոր են նաև այլ գործոններ։ Անցած ընտրական փուլի մի քանի խաղերում մենք երկար ժամանակ առաջատար էինք հաշվի մեջ, սակայն վերջում կորցնում էինք կենտրոնացումը և պարտվում։ Հիմա մենք շատ բարդ խմբում ենք. Ռումինիա, Դանիա, Լեհաստան, Մոնտենեգրո, Ղազախստան։ Բայց այլընտրանք չկա, պետք է պայքարել և փորձել ուրախացնել մեր երկրպագուներին»,- ասում է Սիմոնյանը։ Նրա խոսքով` խաղացողներն անհարմար են զգում երկրպագուների առջև, որոնք մշտապես աջակցում են իրենց։

«Բոլոր ջանքերը կգործադրենք, որպեսզի շնորհակալություն հայտնենք նրանց»,- ասել է Սիմոնյանը։ Խոսելով թիմի հետագա ճակատագրի մասին գլխավոր մարզչի փոփոխությունից հետո` Սիմոնյանը նշել է, որ Վարուժան Սուքիասյանն իսկույն ներկայացրել է իր դիրքորոշումը. հավաքականի անդամները պետք է մշտապես խաղան։ «Իրավիճակը միանգամայն թափանցիկ է. խաղալու եմ «Ցյուրիխի» կազմում, շարունակելու եմ հանդես գալ հավաքականում։ Եթե ոչ` դուրս կմնամ կազմից»,- ասել է Սիմոնյանը։

Հուլիսին Սանկտ Պետերբուրգում տեղի ունեցած 2018թ.-ի ֆուտբոլի աշխարհի առաջնության որակավորման փուլի վիճակահանության արդյունքներով Հայաստանի հավաքականը հայտնվել է E խմբում Ռումինիայի, Դանիայի, Լեհաստանի, Մոնտենեգրոյի, Ղազախստանի թիմերի հետ։