ԵՐԵՎԱՆ, 8 հունվարի — Sputnik. Բնակչության շրջանում սուր-շնչառական վարակներով հիվանդացության թվի ավելացան հետ կապված` հունվարի 9-ին և 10-ին Երևանի քաղաքապետարանի ենթակայության ամբուլատոր-պոլիկլինիկական բոլոր հաստատությունները կաշխատեն հատուկ ռեժիմով՝ առավոտյան ժամը 10:00-ից մինչև 17:00-ն, հայտնում է քաղաքապետարանի մամուլի ծառայությունը։
Երևանի քաղաքապետ Տարոն Մարգարյանի հանձնարարությամբ` նույն աշխատակարգով կաշխատեն նաև տեղամասային բժիշկները և մանկաբույժները:
Տոնական բոլոր օրերին՝ դեկտեմբերի 31-ից մինչև հունվարի 7-ը, քաղաքապետի հանձնարարությամբ Երևանի քաղաքապետարանի ենթակայության ամբուլատոր-պոլիկլինիկական բոլոր հաստատություններում առավոտյան 10:00-ից մինչև 14:00-ն սահմանված է եղել հերթապահություն: Երևանի քաղաքապետարանի ենթակայության ամբուլատոր-պոլիկլինիկական բոլոր հաստատություններն ապահովված են եղել անհրաժեշտ դեղորայքով:
Շտապօգնության կողմից դեկտեմբերի 31-ից մինչև հունվարի 6-ը ներառյալ սպասարկվել է 5840 կանչ:
Հիշեցնենք, որ սուր-շնչառական վարակներով հիվանդացության թվի ավելացան հետ կապված` նախօրեին կրթության և գիտության նախարարի հրամանով Հայաստանում մեկ շաբաթով երկարաձգվեցին ձմեռային արձակուրդները։
