ԵՐԵՎԱՆ, 3 հունվարի — Sputnik. «Կումտորի» աշխատակից Մայքլ Մաքֆիթը, ով «Չուչուկ» կերակրատեսակն (ձիու մսից պատրաստված երշիկ) անվանել է ձիու սեռական օրգան, ձերբակալվել է «Մանաս» օդանավակայանում, Sputnik Ղրղըզստանին հայտնել է Լեռնամետաղագործական արհմիության կենտրոնական կոմիտեի նախագահ Էլդար Տաջիբաևը:
Դեկտեմբերի 30-ին ոսկու հանքի աշխատող Մայքլ Մաքֆիթը սոցցանցերում լուսանկար էր հրապարակել, որտեղ ղրղըզական ազգային Չուչուկ կերակրատեսակն անվանել էր ձիու սեռական օրգան: Սոցցանցերում այս երևույթը դժգոհության ալիք էր բարձրացրել: «Կումտոր գոլդ» ընկերության աշխատակիցները գործադուլ էին հայտարարել ու նամակով դիմել ՂՀ ՆԳՆ, գլխավոր դատախազություն ու ԱԱՊԿ` պահանջելով քրեական պատասխանատվության ենթարկել արտասահմանցուն` ազգային արժանապատվությունը վիրավորելու համար: Մաքֆիթն իր հերթին ջնջել էր սոցցանցի գրառումն ու ներողություն խնդրել:
««Մանաս» օդանավակայանում առավոտյան ժամը 3-ին նրան ձերբակալել են ոստիկանության աշխատակիցները», — ասել է Տաջիբաևը:
Նա չի բացառում, որ Մաքֆիթը փորձում էր փախուստի դիմել:
Ընկերության արհմիությունն իր հերթին հայտնել է օտարերկրացու ձերբակալման մասին:
«Երեկ գիշերային հերթափոխը հրաժարվել է աշխատանքի դուրս գալ, իսկ առավոտյան հերթափոխը աշխատանքի է դուրս եկել այն բանից հետո, երբ ղեկավարությունը խոստացել է ժամանել», — նշել է «Կումտոր» ընկերության արհմիության անդամ Բեգալի Ակուլուևը:
Ավելի ուշ Facebook սոցցանցի իր էջում Մայքլ Մաքֆիթը գրել է. «Ես ուզում եմ անկեղծորեն ներողություն խնդրել իմ խոսքերի համար: Ես իսկապետ մտադիր չէի որևէ մեկին վիրավորել, ես անչափ ցավում եմ, ես նման մտադրություն չեմ ունեցել»:
Աշխատակիցներն առաջվա պես պահանջում են նրան պատասխանատվության ենթարկել: Ղրղըզստանի հանրապետությունում գտնվող «Կումտոր» հանքավայրը Կենտրոնական Ասիայի խոշորագույն ոսկու հանքավայրն է, որը գտնվում է Centerra Gold Inc ընկերության կառավարման ներքո:
Սա երկրի հանքարդյունաբերության ոլորտի առաջին ու ամենանշանակալի ընկերությունն է, որը ստեղծվել է արտասահմանյան ներդրումների շնորհիվ: «Կումտորի» արտադրանքն այսօր զբաղեցնում է ազգային ապրանքի արտահանման ավելի քան մեկ երրորդը, իսկ ընկերության առաքելությունը արտադրությամբ չի սահմանափակվում: «Կումտոր գոլդ» ընկերությունը «Կումտոր» նախագծի օպերատորն է և պատասխանատվություն է կրում արտադրության ողջ փուլի համար:
