ԵՐԵՎԱՆ, 28 դեկտեմբերի — Sputnik. Փարիզի արվարձաններից մեկում թաքնված ահաբեկիչների բնակարան ներխուժելու ժամանակ զոհված ոստիկանական շունը հետմահու արժանացել է կենդանիների համար նախատեսված ռազմական բարձրագույն պարգևի։
Բելգիական հովվաշունը զոհվել է նոյեմբերի 18-ին թշնամու արձակած փամփուշտից։
«Մարիա Դիկինի մեդալը շնորհվում է գործին հավատարիմ լինելու համար, և Դիզելն իսկապես արժանի էր այդ պարգևին», — գրված է PDSA բրիտանական բարեգործական անասնաբուժական կազմակերպության հայտարարության մեջ։ Հենց այս կազմակերպությունն է 1943 թվականին սահմանել այդ պարգևը։
Դիզելը 30-րդ շունն է, որն արժանացել է այդ մեդալին, նշում է PDSA-ն։ Այդ պարգևին է արժանացել Երկրորդ աշխարհամարտին «մասնակցած» 32 փոստատար աղավնի, 3 ձի և 1 կատու։
Դեկտեմբերի սկզբին ՌԴ ՆԳՆ-ն Ֆրանսիայի ոստիկաններին է հանձնել Դոբրինյա անունով գերմանական հովվաշան ձագին, որը պետք է փոխարինի հատուկ գործողությունների ժամանակ զոհված շանը։
