Դավիթ Գալստյան, Sputnik.
Տոնածառ գնելու նրբությունները Sputnik Արմենիայի համար բացահայտեց Վարդանը, ով արդեն 20 տարի աճեցնում և վաճառում է Ամանորի եղևնիներ:
«Եղևնի գնելիս, իհարկե, պետք է ընտրել ամենագեղեցիկը, բայց միաժամանակ կարևոր է հաշվի առնել մի քանի գործոն: Ամենագեղեցիկը երկար փշեր ունեցող տոնածառերն են: Իսկ երկար փշերն ավելի հատուկ են սոճուն, դրանք ավելի լայնասաղարթ և փարթամ տեսք ունեն»,- պատմում է Վարդանը:
Նրա խոսքով՝ թեև ծառը շատ տեղ է զբաղեցնում, ավելի լավ է ընտրել սոճի. նրա փշերը չեն թափվի տոնից նույնիսկ 2-3 շաբաթ անց:
«Եղևնի ընտրելիս ստուգեք ճյուղերի ամրությունը: Եթե դրանք ճկվեն, նշանակում է՝ ծառը վերջերս են կտրել, և այն ավելի երկար կծառայի: Եթե չեք կարողանում ընտրություն կատարել մի քանի ծառի միջև, ապա ավելի լավ է ընտրեք հաստ բնով եղևնի»,- ասում է Վարդանը:
Հաստ բնի առկայությունը վկայում է առողջության և անհրաժեշտ նյութերի լավ պաշարի մասին, որոնք կօգնեն եղևնուն ավելի լավ պահպանվել:
Մասնագետը խորհուրդ է տալիս մի քանի փուշ տրորել մատներով, յուղի առկայությունը և հաճելի բույրն ամեն ինչ կպատմեն եղևնու մասին:
Վարդանը խորհուրդ է տալիս եղևնի ընտրելիս նախապատվությունը տալ կապույտին. այդ ծառի փշերն ավելի լավ են դիմանում սենյակային ջերմաստիճանին:
Ընդհանուր առմամբ, Երևանում եղևնու գները սկսվում են 20 դոլարից և կարող են հասնել 1,5 հազար դոլարի: Առավել մեծ պահանջարկ են վայելում էժան եղևնիները, որոնք արժեն մոտ 20-30 դոլար:
Լավ եղևնի ընտրելուց բացի, կա տնային պայմաններում նրա «կյանքը» երկարացնելու մի քանի միջոց:
Դրա համար մասնագետը խորհուրդ է տալիս կտրած տեղից մի քանի սանտիմետր վերև հանել կեղևը և եղևնին ջրով դույլի մեջ դնել, այնպես, որ ջուրը ծածկի կտրված տեղը: Եղևնին որքան հեռու գտնվի ջերմության աղբյուրներից, այնքան ուշ կկորցնի իր թարմությունը:
