Անի Լիպարիտյան, Sputnik
ԵՐԵՎԱՆ, 22 դեկտեմբերի– Sputnik. Նոր տարվա նախաշեմին ամեն ինչ հիշեցնում է կախարդական տոնի մասին. քաղաքը զարդարվում է լույսերով, փայլերով, ցուցափեղկերը «գեղեցկանում» են մոմերի և տոնական այլ զարդերի շնորհիվ, փողոցներում հաճախ կարելի է հանդիպել Ձմեռ պապին և Ձյունանուշին, հեքիաթների հերոսներին։
Ու ամեն տարի մարդկանց մոտ հարց է ծագում, թե ինչպես զարդարել տոնածառը, որը ոչ միայն կյանքի, հավերժության, այլև Սուրբ ծննդյան և Ամանորի տոների խորհրդանիշ է։
Ֆլորիստ–դիզայներ Մուշեղ Պողոսյանը հատուկ Sputnik Արմենիա պորտալի համար զարդարեց մեծ տոնածառը` բացահայտելով 2016թ.–ի տոնական եղևնին զարդարելու որոշ գաղտնիքներ։
«Այս տարի արդիական են կարմիրը և կրակի գույները, քանի որ Հրե Կապիկի տարի է։ Այնպես որ կարող եք համարձակորեն ավելացնել տաք և վառ գույներ` կարմիրի և նարնջագույնի բոլոր երանգները։ Նորաձև են նաև կապույտի երանգները»,– նշեց պորտալի զրուցակիցը։
Մուշեղը հավելեց նաև, որ այս տարի կարելի է տոնածառի գագաթի ավանդական և հնաոճ դարձած «աստղը» փոխարինել դեկորի այլ տարրերով, օրինակ` մեծ ծաղիկով կամ Ձմեռ պապի գլխարկով։
Այս տարի ամենից շատ գնահատվում են ստեղծագործ և յուրահատուկ մոտեցումները, որի հետ կապված` մասնագետը հատուկ խորհուրդ տվեց։
«Դիզայների ամենաստեղծագործ խորհուրդն Ամանորին տոնածառը բանաններով զարդարելն է։ Նման արտառոց մոտեցումը կզարմացնի հարևաններին և հյուրերին։ Իհարկե, խոսքն արհեստական բանանի մասին է»,– ասաց Մուշեղը։
Sputnik Արմենիա պորտալի զրուցակիցը պատմեց նաև, որ գեղեցիկ տոնածառը պետք է համաչափ զարդարված լինի։ Գաղտնիքը շատ պարզ է. տոնածառի մեծ խաղալիք գնդերը պետք է կախել եղևնու ներքևում, փոքրերը` վերևում։
Ինչ վերաբերում է երանգներին, ապա Մուշեղի խոսքով` պետք է նախապատվությունը տալ միայն երեք գույնի։ Եվ եթե դուք խաղալիք եք ընտրում, ապա դրանք պետք է լինեն կոնկրետ երեք գույնի։
«Հայաստանում Ամանորին հատուկ ուշադրությամբ են վերաբերում և ցանկանում են, որպեսզի ամեն ինչ իդեալական լինի։ Ընդհանրապես, ես խորհուրդ եմ տալիս տանը բնական եղևնի դնել, որովհետև այն յուրահատուկ բույր և աուրա ունի։ Բայց ես անձամբ նախընտրում եմ արհեստական տոնածառը։ Խորհուրդ եմ տալիս, որպեսզի ձեր տոնածառի զարդարանքի մեջ լինի կապիկ։ Դա կարող է լինել ինչպես տոնածառի զարդ, այնպես էլ փափուկ խաղալիք»,– եզրափակեց Մուշեղը։
Sputnik Արմենիա պորտալը շնորհավորում է բոլորի գալիք Ամանորը։
