Գոհար Սարգսյան, Sputnik
Գեղասահքի նոր դպրոցի սաների ու մարզիչների ոգևորությանը չափ ու սահման չկա: Մարզիչներից Էլեն Համբարձումյանն, օրինակ, ամեն անգամ նոր սահադաշտի սառույցին ոտք դնելիս օրհնում է այն ստեղծողներին:
Հիմա նրանք մարզվում են միջազգային չափորոշիչներին համապատասխանող սահադաշտում, ոտքի տակ հարթ սառույց է: Այնինչ նախկինում սաները ստիպված էին մարզվել ոչ որակյալ սահադաշտում: Ավելի երջանիկները հնարավորություն ունեին սահել Ռուսաստանի սահադաշտերում:
«Գեղասահքի նախկին դպրոցի սահադաշտը շատ փոքր էր, մենք մեր ծրագրերը մշակում էինք դրա չափերին համապատասխան, հետո ներկայանում մեծ սահադաշտերում ու խնդիրներ ունենում»,- նշում է նա։ Ըստ մարզչի` պրոֆեսիոնալների համար խնդիր էր նաև այդ սահադաշտի որակը, քանի որ միջոցներ չլինելու պատճառով չէին կարողանում հաճախ ջրել սառույցը, այն փափկում էր՝ հնարավորություն չտալով մարզիկներին կատարելագործել գեղասահքի վարժությունների կատարման տեխնիկան:
Իսկ մարզիչ Վահրամ Սարգսյանը տեղեկացրեց, որ արտասահմանում կան հայ մարզիչներ, ովքեր մարզում են հայտնի գեղասահորդներին, անգամ` ամբողջ հավաքականների: Նրանցից է կանադահայ գեղասահորդուհի ու նաև մարզիչ Թինա Կարապետյանը:
Մարզիչների խոսքով՝ հայկական հավաքականի հույսն այսօր գեղասահորդուհի Անաստասիա Գալուստյանն է, ով այնքան միավորներ է հավաքել, որ կկարողանա մասնակցել Պատանիների օլիմպիադային: Օրեր առաջ Sputnik Արմենիային հաջողվել էր զրուցել Անաստասիայի հետ և հարցնել նոր սահադաշտի ու նրա հայ-ռուսական արմատների մասին:
«Ես պապիկիս խոստացել եմ հայերեն սովորել: Հայրական կողմից հայուհի եմ: Դրա համար էլ Հայաստանում զգում եմ ինչպես տանը: Ինչ վերաբերում է Իրինա Ռոդնինայի անվան սահադաշտին, այստեղ հիանալի սառույց է ու հաճելի ջերմաստիճան: Հպարտ եմ, որ մասնակցել եմ սահադաշտի բացման արարողությանը»,- անկեղծացել էր Անաստասիան:
Հիշեցնենք, որ Գեղասահքի օլիմպիական չեմպիոն, աշխարհի և Եվրոպայի բազմակի չեմպիոն Իրինա Ռոդնինան այնքան ոգևորվեց իր անունով գեղասահքի դպրոցի բացման առիթով, որ խոստացավ` Հայաստանն աշխարհի չեմպիոն կունենա: Ուստի նա ժամանակ առ ժամանակ այստեղ դասընթացներ կանցկացնի:
