Թուրքիայի հանրապետական ժողովրդական կուսակցության պատգամավոր Էրեն Էրդեմը RT-ին տված հարցազրույցում պատմել է, որ 2013 թվականին Թուրքիայից ԻՊ գրոհայիններին զարին տեսակի գազ է մատակարարվել, որն օգտագործվում է քիմիական զենքի արտադրության մեջ:
Անկարայի գլխավոր դատախազությունը Թուրքիայի հանրապետական ժողովրդական կուսակցության պատգամավոր Էրեն Էրդեմի նկատմամբ հետաքննություն է սկսել։ Պատգամավորը RT հեռուստաալիքի լրագրողներին տված հարցազրույցում պատմել է, որ ԻՊ գրոհայիններին զարին տեսակի գազ է (նյարդակաթվածային ներգործության թունավոր նյութ) մատակարարվել Թուրքիայից, և այդ գազն օգտագործվում է քիմիական զենք պատրաստելու համար։
«Քիմիական զենքի համար նյութերը ներկրվել են Թուրքիա, հետո տեղափոխվել «Իսլամական պետություն» խմբավորման ճամբարներ։ Այն ժամանակ նրանք հայտնի էին «Ալ Քայիդա» անունով։ Մենք այդ փաստը հաստատող ձայնագրություններ ունենք», — ասել է պատգամավորը լրագրողներին։
Նրա կարծիքով, հավանականությունը մեծ է, որ 2013 թվականի օգոստոսին Գութայում տեղի ունեցած հարձակումներն իրականացվել էին այն զենքերով, որոնք պատրաստվել էին Թուրքիայով անցած նյութերով։
«Գործի նյութի ու ամսաթվի վրա հիմնվելով` կարծում եմ, որ սիրիական կառավարությունը զարին տեսակի գազ չի ունեցել։ Որքան ես եմ հիշում, դրանք հարձակվող զորքերն են եղել, որոնք զարին են ունեցել։ Այդ գործը փակվել էր, որպեսզի ողջ պատասխանատվությունը դրվեր սիրիական կառավարության վրա», — հայտնել է թուրք քաղաքական գործիչը։
Տեղական ԶԼՄ-ների տվյալով` Էրդեմը պետական դավաճանության մեջ է կասկածվում։ Նա կարող է զրկվել պատգամավորական անձեռնմխելիությունից։
