ԵՐԵՎԱՆ, 16 դեկտեմբերի- Sputnik. Ուկրաինայի ժողովրդական պատգամավորները Գերագույն ռադայում գրանցել են ներքին գործերի նախարար Արսեն Ավակովին զբաղեցրած պաշտոնից հեռացնելու մասին որոշման նախագիծ, երեքշաբթի հաղորդվում է Ուկրաինայի խորհրդարանի կայքում: Որոշման նախագիծը Ռադա է մտցրել պատգամավորների խումբը: «Ավակով Արսեն Բորիսովիչին հեռացնել Ուկրաինայի ՆԳՆ ղեկավարի պաշտոնից»,– ասվում է փաստաթղթում։
Պատգամավորները որոշմանը կից բացատրագրում հիմնավորել են իրենց նախաձեռնությունը նրանով, որ Ավակովն անտեսել է լյուստրացիայի մասին օրենքի պահանջները և ՆԳՆ պաշտոններում նշանակել այն անձանց, որոնք օրենքով պետք է ազատվեին։
«Նախարարի նման գործողությունները նվազեցնում են պետության դերը հասարակական հարաբերությունների նորմալ գործունեությունն ապահովելու ոլորտում, չէ՞ որ օրենքի պահանջների անտեսումն ամենակարևոր ուժային կառույցներից մեկի ղեկավարի մակարդակով ցույց է տալիս քաղաքացիներին պաշտպանելու պետության անկարողությունը»,– ասվում է բացատրագրում։
Պատգամավորները նշում են, որ Ավակովի պաշտոնավարման շրջանում չի ակտիվացվել «եվրոմայդանի» մասնակիցների դեմ հանցագործությունների հետաքննությունը, դրական տեղաշարժեր չեն եղել իշխանության նախկին ներկայացուցիչների կոռուպցիոն հանցագործությունների հետաքննության մեջ։
