ԵՐԵՎԱՆ, 15 դեկտեմբերի– Sputnik. Ուկրաինայի ՆԳՆ–ում չեն դիտարկում գերատեսչության ղեկավար Արսեն Ավակովի հրաժարականի հնարավորությունը Օդեսայի նահանգապետ Միխայիլ Սահակաշվիլու հետ կապված միջադեպի պատճառով, որի ժամանակ նախարարը ջուր է լցրել Սահակաշվիլու դեմքին, երեքշաբթի մամուլի ասուլիսում լրագրողներին հայտարարել է ՆԳՆ մամուլի քարտուղար Արտյոմ Շևչենկոն։
Ավելի վաղ Ուկրաինայի ՆԳՆ ղեկավար Արսեն Ավակովը հայտարարել էր, որ Օդեսայի մարզպետի դեմքին ջուր է լցրել իրեն ուղղված վիրավորանքների համար։ Ավակովի խոսքով` Սահակաշվիլին բարձրացրել է ձայնը և վիրավորել իրեն ի պատասխան այն հարցի, թե ինչու է նա քննարկել Օդեսայի նավահանգստին մոտ գտնվող գործարանի սեփականաշնորհումը «Ուրալխիմի ռուս օլիգարխի հետ»։ Ավակովը Սահակաշվիլուն անվանել է պոպուլիստ և հայտարարել, որ չի պատրաստվում հանդուրժել իրեն ուղղված վիրավորանքները։
«Ես հիմքեր չեմ տեսնում հրաժարականի համար»,– մեջբերում է Շևչենկոյի խոսքերը «112 Ուկրաինա» հեռուստաալիքի կայքը։
Ինչպես պնդում է ՆԳՆ մամուլի քարտուղարը, բոլոր ռազմական խմբերը, որոնք ծառայություն են տանում Ուկրաինայում, վերահսկվում են, և «նախարարը չի կարող վերահսկել ոչ մի զինված ոչ պաշտոնական խմբավորում»։
