ԵՐԵՎԱՆ, 15 դեկտեմբերի — Sputnik. Օդեսայի մարզպետ Միխեիլ Սահակաշվիլին Ուկրաինայի նախագահի աշխատակազմից պահանջել է հրապարակել այն տեսանյութը, որում Ուկրաինայի ներքին գործերի նախարար Արսեն Ավակովը նրա երեսին բաժակով ջուր է լցնում։ Սահակաշվիլին ուզում է, որ հասարակությունը կարողանա գնահատել Ավակովի և Ուկրաինայի վարչապետ Արսենի Յացենյուկի պահվածքը։
Ավելի վաղ Ուկրաինայի ՆԳՆ ղեկավար Արսեն Ավակովը հայտարարել էր, որ Օդեսայի մարզպետի դեմքին ջուր է լցրել իրեն ուղղված վիրավորանքների համար։ Ավակովի խոսքով` Սահակաշվիլին բարձրացրել է ձայնը և վիրավորել իրեն ի պատասխան այն հարցին, թե ինչու է նա քննարկել Օդեսայի նավահանգստին մոտ գտնվող գործարանի սեփականաշնորհումը «Ուրալխիմի ռուս օլիգարխի հետ»։ Ավակովը Սահակաշվիլուն անվանել է պոպուլիստ և հայտարարել, որ չի պատրաստվում հանդուրժել իրեն ուղղված վիրավորանքները։
«Ես պահանջում եմ, որ նախագահի մամուլի ծառայությունը հրապարակի վարչապետի ու ներքին գործերի նախարարի անվայել ու սադրիչ պահվածքի ողջ տեսանյութը։ Նկարահանող երեք տեսախցիկ կար, և ուկրաինացիները իրավունք ունեն տեսնելու և իմանալու, թե ով է իրենց ղեկավարում։ Ես պատասխանատու եմ յուրաքանչյուր բառիս համար։ Ժամանակն է, որ այն սուբյեկտները, որոնք երկիրը կործանման են հասցրել, պատասխան տան իրենց բառերի համար», — Facebook սոցցանցի իր էջում գրել է Սահակաշվիլին։
