ՀՀ սահմանադրական բարեփոխումների հանրաքվեի ձայների վերահաշվարկ է ընթանում

ԵՐԵՎԱՆ, 8 դեկտեմբերի – Sputnik. ՀՀ սահմանադրական բարեփոխումների հանրաքվեի 11 ընտրատարածքային հանձնաժողովներ ստացել են թվով 78 տեղամասերում քվեարկության արդյունքների վերահաշվարկի դիմումներ, Sputnik Արմենիային հայտնեց ԿԸՀ մամուլի քարտուղար Հերմինե Հարությունյանը։

Հանրաքվեի 3 ընտրատարածքային հանձնաժողովներ ստացել են դիմումներ` թվով 3 տեղամասերի քվեարկության արդյունքներն անվավեր ճանաչելու վերաբերյալ:

«Բոլոր դիմումներին օրենքով սահմանված կարգով և ժամկետներում ընթացք կտրվի»,- նշեց Հարությունյանը:

Նախնական տվյալներով` 1997 տեղամասային հանձնաժողովների գրանցամատյաններից մոտ հարյուրում են առկա քվեարկության ընթացքի մասին գրառումներ:

2015թ. դեկտեմբերի 6-ի ՀՀ Սահմանադրության փոփոխությունների հանրաքվեի քվեարկության արդյունքների վերահաշվարկի կամ քվեարկության արդյունքներն անվավեր ճանաչելու մասին դիմումներ համապատասխան ընտրատարածքային հանձնաժողով կարող էին ներկայացվել դեկտեմբերի 7-ին` ժամը 12.00-ից մինչև 18.00-ն:

Հիշեցնենք, որ դեկտեմբերի 6-ին Հայաստանում տեղի ունեցավ սահմանադրական բարեփոխումների հանրաքվեն, որի ժամանակ սահմանադրության նոր տարբերակին կողմ քվեարկեց 825622 մարդ (հանրաքվեի մասնակիցների 63,35% կամ քվեարկության մասնակիցների ցուցակում ընդգրկվածների 32,17%-ը), «դեմ»` 421593 մարդ (մասնակիցների 32,35%-ը կամ քվեարկության մասնակիցների ցուցակում ընդգրկվածների 16,42%-ը)։

Քվեարկության մասնակիցների ցուցակում ընդգրկված է եղել 2 մլն 550 հազար 323 քաղաքացի, հանրաքվեին մասնակցել է 1 մլն 296 հազար 368-ը կամ ցուցակում ներառված անձանց 50,51%-ը։