ԵՐԵՎԱՆ, 3 դեկտեմբերի – Sputnik. Մայրաքաղաքի գլխավոր ու երկրորդական փողոցները լիարժեք երթևեկելի են, հայտնում է Երևանի քաղաքապետարանի պաշտոնական կայքը։
«Դեկտեմբերի 3-ի լուսադեմին մայրաքաղաքում սկսված ձյան տեղումներին զուգահեռ վարչական շրջաններում սկսվել և ներկայում շարունակվում են գլխավոր և երկրորդական փողոցների ձնամաքրման աշխատանքները»,- ասված է հաղորդագրությունում:
Նշվում է նաև, որ նախապես աշխատանքային պատրաստ վիճակի են բերվել համապատասխան մեքենամեխանիզմները: Գործընթացում ներգրավված են նաև վարչական շրջանների կոմունալ ծառայությունների ու համատիրությունների աշխատակիցները:
Հիշեցնենք, որ դեկտեմբերի 3-ին Հայաստանում ամենուրեք ձյուն է տեղում, հատկապես լեռնային գոտիներում տեղումներ են ինտենսիվ ձյան տեսքով, ինչպես նաև բուք, մերկասառույց և տեսանելիության անկում։
Այսօր ցերեկը Երևանում կլինի 0-2 աստիճան տաքություն, երեկոյան` 2-4 աստիճան ցուրտ։
