ԵՐԵՎԱՆ, 23 նոյեմբերի – Sputnik. Անցյալ շաբաթ Արթուր Աբրահամը հինգերորդ անգամ WBO վարկածով պաշտպանեց աշխարհի չեմպիոնի կոչումը (մինչև 76,2 կգ) երկրորդ միջին քաշային կարգում
35-ամյա Արթուր Աբրահամը պաշտպանել է իրեն պատկանող գոտին միջին քաշային կարգում աշխարհի չեմպիոնի կոչման նախկին հավակնորդ 33-ամյա բրիտանացի Մարտին Մյուրեյի հետ պայքարում։
Պայքարն ընթացել է բոլոր 12 ռաունդներով և ավարտվել Աբրահամի հաղթանակով. դատավորներից երկուսը 116-111, 115-112 հաշվով հաղթանակ են շնորհել Աբրահամին, իսկ երրորդը համարել է, որ Մյուրեյն ավելի ուժեղ է` տալով նրան 115-112 միավոր։ Հարկ է նշել, որ 11-րդ փուլում Մյուրեից մեկ միավոր է հանվել` հակառակորդին պահելու համար։
«Ես երազում եմ նվաճել բոլոր գոտիներն այս քաշային կարգում։ Դա այն է, ինչը խթան է ինձ համար և պայքարի կրակը պահպանում է իմ մեջ։ Կարիերայի այս փուլում ես չեմ ցանկանում պայքարել թույլ հակառակորդների հետ։ Մյուրեյը լիովին բավարարում է իմ պահանջներին։ Եթե ես պարտվեմ, ապա կկոտրեմ իմ բոլոր մտքերը։ Մյուրեյը չի կարող հաղթել ինձ, չնայած որ պայքարը թեժ է լինելու։ Հաղթանակն իմ կողմն է», – ընդգծում է Աբրահամը։
Մյուրեյը մենամարտից առաջ իր հերթին հայտնեց, որ Աբրահամը վերջին շրջանում ավելի դանդաղ է գործում, այնուամենայնիվ հետաքրքիր մրցապայքար է կանխատեսում։
4 պարտությունից հետո սա 35-ամյա Աբրահամի 44-րդ հաղթանակն էր (դրանցից 29-ը` նոկաուտով)։ 33-ամյա Մյուրեյը երրորդ պարտությունն է տարել` հաղթելով 32 խաղում (15 – նոկաուտով) և մեկ ոչ ոքի է ունեցել։ Բրիտանացու համար չեմպիոնի գոտին տանելու 4-րդ անհաջող փորձն էր սա։
Մյուրեյը հաջորդ օրը հայտնել էր, որ վստահ էր իր հաղթանակի մեջ մինչև արդյունքների հրապարակումը։
«Ակնհայտ է, որ ես ինձ լիովին ոչնչացած եմ զգում։ Ես լրջորեն կարծում էի, որ դա կլինի իմ օրը, և երբ հնչեց եզրափակիչ զանգը, նույնիսկ անկախ այն բանից, որ մենք Գերմանիայում ենք, ես դեռ կարծում էի, որ գոտին իմը կլինի։ Ես կարծում էի, որ արել եմ հնարավոր ամեն ինչ։ Նույնիսկ այն ժամանակ, երբ նրանք ասացին, որ սա միասնական որոշում չի եղել, ես մտածում էի, որ տիտղոսն իմն է։ Գիտեմ, ես չափից դուրս լավն եմ բոքսը լքելու համար, սակայն այն ամենով, ինչ ես հիմա զգում եմ, էլ ի՞նչ է մնում ինձ։ Սա իմ չորրորդ փորձն էր։ Ես այլևս չեմ կարող այսպես շարունակել։ Չեմ կարող այդ կերպ վարվել իմ ընտանիքի հետ», – ասել է Մյուրեյը։
Մյուրեյի առաջխաղացմամբ զբաղվող Էդդի Հիրնն արդեն հայտնել է, որ պատրաստ է լուրջ ներդրումներ անել, որպեսզի Աբրահամի հետ ռևանշ կազմակերպի, սակայն Կալե Զաուերլանդը` նրա փրոմոութերը, կասկածում է նման հավանականությանը։
«Եկեք սթափ նայենք իրավիճակին։ Աբրահամը թեև հաղթանակ է տարել մի փոքր տարբերությամբ, սակայն դատավորների որոշումը սխալ չի եղել։ Մարտինը շատ լավ բռնցքամարտիկ է։ Նա իսկապես արժանի է այդ կոչմանը, և հուսով եմ, որ մի օր նրան կհաջողվի ստանալ այն», – ասել է Զաուերլանդը։
