ԵՐԵՎԱՆ, 23 նոյեմբերի – Sputnik. Բելգիայում ՀՀ դիվանագիտական ներկայացուցչություններն աշխատում են բնականոն ռեժիմով, Facebook-ի և Twitter-ի իր էջերում գրել է Հայաստանի ԱԳՆ մամուլի քարտուղար Տիգրան Բալայանը։
«Բրյուսելում ՀՀ դիվանագիտական ներկայացուցչությունները՝ Բելգիայում դեսպանությունը, ԵՄ-ում և ՆԱՏՕ-ում առաքելությունները, բնականոն աշխատում են», – գրել է Բալայանը:
Ավելի վաղ Բրյուսելում իր դեսպանատան աշխատանքն անվտանգության նկատառումներով ժամանակավորապես դադարեցրել էր Կանադան։
Նոյեմբերի 13-ի Փարիզի ահաբեկչության գործով Բրյուսելի և Լիեժի շրջանում երկուշաբթի հինգ մարդ է ձերբակալվել։ Ավելի վաղ Բելգիայի իշխանությունը հայտնել էր Բրյուսելի համայնքում և Շառլեռլուա քաղաքում հատուկ գործողությունների ընթացքում ձերբակալված 16 անձանց մասին։
Շաբաթ օրվանից մայրաքաղաքի տարածքում գործում է ահաբեկչական սպառնալիքի ամենաբարձր` 4-րդ աստիճանը, զինվորականներն ու զինված ոստիկանությունը վերահսկում են փողոցները, փակ են դպրոցները և համալսարանները, մետրոն, առևտրի և զվարճանքի կենտրոնները։
