ԵՐԵՎԱՆ, 23 նոյեմբերի – Sputnik. Հայաստանի ԿԲ–ն բարձրացրել է երկրի ՀՆԱ–ի աճի կանխատեսումները մինչև 3,2-3,9%, ասվում է ԿԲ–ի հաշվետվության մեջ, որը հիմնված է 2015 թվականի չորրորդ եռամսյակի դրամավարկային քաղաքականության ծրագրի և երրորդ եռամսյակի դրամավարկային քաղաքականության կատարողականի վրա։
Օգոստոս ամսվա համար ՀՀ ԿԲ–ի նախկին կանխատեսումները տատանվում էին 2,8-3,6% սահմաններում։ Սակայն ըստ պետբյուջեի` հայկական տնտեսության աճը 2015 թվականին նախատեսված է 4,1 տոկոսի չափով։
«2015 թվականի տնտեսության աճի կանխատեսումները վերանայվել են ծառայությունների և արդյունաբերության ոլորտում առաջին կիսամյակի սպասվածից ավելի բարձր աճի հաշվին։ Սպասվող տնտեսական աճին կնպաստի մաքուր արտահանումը», – գրված է հաշվետվության մեջ։
Արտահանման ծավալների վրա ազդել են վերջին տարիների կառուցվածքային բարեփոխումները, ագրարային հատվածի դրական միտումները և 2014 թվականի վերջին տեղի ունեցած դրամի արժեզրկումը։
Sputnik Արմենիայի ԿԲ–ի նոր կանխատեսումը մեկնաբանելու խնդրանքին ի պատասխան «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանն ասաց, որ այդպիսի կանխատեսումներ իրենք արել են դեռ տարեսկզբին։
«Այս ցուցանիշը համապատասխանում է տնտեսական զարգացման տեմպերին։ Առաջին տասը ամիսների ընթացքում տնտեսական աճը կազմել է 3,9%։ Եթե այդ միտումը շարունակվի, ապա հասկանալի է, որ այդ թվից շեղումներ դժվար լինեն կամ մինիմալ կլինեն։ Այդ իսկ պատճառով ես կարծում եմ, որ այդ կանխատեսումը բավականին իրատեսական է», – ասաց Մանասերյանը։
ԿԲ–ն ենթադրում է, որ 2016 թվականին տնտեսության աճի տեմպերը կդանդաղեն, իսկ 2017 թվականին կաճեն` շնորհիվ կառավարության արտահանման և ներդրումների խթանման ծրագրի։
Ավելի վաղ Հայաստանի տնտեսության աճի կանխատեսումներ արել են ԱՄՀ–ն և Համաշխարհային Բանկը։
Բացի այդ, Հայաստանի ԱՎԾ-ն հրապարակել է 2015 թվականի հունվար–հոկտեմբեր ամիսների տնտեսական ակտիվության ցուցանիշը, որը գերազանցում է անցյալ տարվա 3,5% ցուցանիշը։
