«Հանրապետական առաջարկ» ընդդիմադիր կուսակցության թեկնածու Մաուրիսիո Մակրին տոնել է Արգենտինայի նախագահական ընտրություններում երկրորդ փուլում տարած հաղթանակը։ Ավելի քան 99% քվեաթերթիկների վերլուծության արդյունքում նա հավաքել է ձայների շուրջ 52%–ը։
Արգենտինայի նախագահական ընտրություններում հաղթանակ տարած ընդդիմադիր Մաուրիսիո Մակրին խոստացել է կառուցել «զրոյական աղքատություն» ունեցող երկիր, պայքարել թմրանյութերի վաճառքի դեմ և համագործակցել այլ երկրների հետ։
«Մենք պետք է կառուցենք զրոյական աղքատության մակարդակ ունեցող Արգենտինա և դա անել բոլորս միասին։ Մենք պետք է պայքարենք թմրանյութերի վաճառքի դեմ և այդ պայքարի շուրջ միավորենք արգենտինացիներին», – ասել է Մակրին` իր շտաբում հետևորդների առջև ելույթ ունենալիս։
Խոսելով արտաքին քաղաքական թեմաների մասին` Մակրին հայտնել է, որ ինքը ցանկանում է «լավ հարաբերություններ ունենալ բոլորի հետ» և «աշխատել բոլորի հետ»` ավելացնելով, որ «արգենտինացիները շատ բան կարող են տալ աշխարհին»։
Սպասվում է, որ Մակրիի առաջին քայլերից մեկը լինելու է արժութային շուկայի ազատականացումը, ինչը տնտեսագետներից շատերի կարծիքով` կհանգեցնի պեսոյի արժեզրկման։ Բացի այդ, նա նախատեսում է Արգենտինայի հյուսիսում խոշոր ենթակառուցվածքային նախագծեր իրականացնել։
Արգենտինայում կիրակի անցկացվել է նախագահական ընտրությունների երկրորդ փուլը։ 99,17% քվեաթերթիկների հաշվարկներից հետո ընդդիմադիր և Բուենոս Այրեսի քաղաքապետ, երկրի ներկայիս առաջնորդ Քրիստին Քիրշներին քննադատող Մաուրիսիո Մակրին ստացել է ձայների 51,40%–ը։ Կառավարամետ թեկնածու և Բուենոս Այրեսի նահանգապետ Դանիել Սցիոլին հավաքել է 48,60%։
Արգենտինայի ընտրություններում առաջատար Մակրին պարել է ցնծացող ամբոխի առջև
© Ruptly
Բաժանորդագրվել
«Հանրապետական առաջարկ» ընդդիմադիր կուսակցության թեկնածու Մաուրիսիո Մակրին տոնել է Արգենտինայի նախագահական ընտրություններում երկրորդ փուլում տարած հաղթանակը
