ԵՐԵՎԱՆ, 23 նոյեմբերի – Sputnik. Դժվար է համատեղել Ռուսաստանի նկատմամբ կիրառվող պատժամիջոցների երկարացումը տարբեր թեմաներով վստահելի բանակցություններ տանելու հետ, հայտնում է ԳԴՀ ԱԳՆ պաշտոնական ներկայացուցիչ Մարտին Շեֆերը։
«Ես համաձայն եմ, դժվար է պատկերացնել մի իրավիճակ, երբ մի կողմից` երկարացվում են փոխադարձ պատժամիջոցները, իսկ մյուս կողմից` կողմերը որոշ թեմաների շուրջ գտնվում են վստահելի բանակցությունների գործընթացում», – ասաց Շեֆերը ճեպազրույցի ժամանակ։
Ավելի վաղ ԱԳՆ ղեկավար Ֆրանկ–Վալտեր Շտայնմայերը հայտնել էր, որ G8 ակումբ Ռուսաստանի վերադարձը կապված կլինի Սիրիայում և Ուկրաինայում առկա իրավիճակի հետ։
Ռուսաստանի և Արևմուտքի հարաբերությունները վատացել են Ուկրաինայի իրադարձությունների հետևանքով։ Հուլիսի վերջին ԱՄՆ–ն և ԵՄ–ն առանձին ֆիզիկական անձանց և ընկերությունների նկատմամբ կիրառվող թիրախային պատժամիջոցներից անցում են կատարել դեպի Ռուսաստանի տնտեսության մեծ հատվածների։ Ի պատասխան` Ռուսաստանը սահմանափակել է պարենային ապրանքների ներմուծումն այն երկրներից, որոնք իր նկատմամբ պատժամիջոցներ են կիրառել։ 2015 թվականի հունիսին Ռուսաստանն, ի պատասխան պատժամիջոցների երկարացման, երկարացրել է մթերային էմբարգոն մեկ տարով` մինչև 2016 թվականի օգոստոսի 5-ը։
