ԵՐԵՎԱՆ, 23 նոյեմբերի — Sputnik. 2014 թվականին ամբողջ աշխարհում ահաբեկչության մակարդակն աճել է 80 տոկոսով: «Ահաբեկչության համաշխարհային ինդեքս 2015» զեկույցից հայտնի է դարձել, որ նախորդ տարի ահաբեկչական գործողությունների հետևանքով սպանվել է 32.658 մարդ: Ի դեպ, 51 տոկոսի դեպքում ահաբեկչության հեղինակները «Իսլամական պետություն» և «Բակո Հարամ» խմբավորումներն են եղել:
Ահաբեկչությունների հետևանքով տեղի ունեցած մահվան դեպքերի ամենամեծ թվերը գրանցվել են Աֆղանստանում, Իրաքում, Նիգերիայում, Պակիստանում և Սիրիայում:
Հայաստանն ամենաանվտանգ երկրների շարքում է` 116-րդ հորիզոնականում: Մեր հարևան երկրներից Ադրբեջանը 93-րդ տեղում է, Վրաստանը` 71-րդ, Իրանը` 39-րդ, իսկ Թուրքիան 27-րդ տեղում է:
Զեկույցի` Հայաստանին վերաբերող հատվածը Sputnik Արմենիայի համար մեկնաբանեց ԱԺ պատգամավոր Թևան Պողոսյանը:
«Աշխարհի տարբեր երկրներում Իսլամական պետության հարձակումները մեծ վնաս են հասցրել հայկական համայնքին: Հիշենք Սիրիայի պատերազմը, երբ զգալի կորուստներ կրեցինք: Եթե դիտարկենք Իրաքի օրինակը, ապա գրեթե կորցրինք մեր հայկական համայնքը: Վերջերս էլ ցավալիորեն պարզեցինք, որ Փարիզի ահաբեկչության արդյունքում մահացավ հայազգի մի աղջիկ: Այս իմաստով ահաբեկչական գործողություններից Հայաստանը տուժել է»,-պատմեց Պողոսյանը:
Թևան Պողոսյանը կարծում է, որ Հայաստանի ազգային անվտանգության մարմինները պետք է ձևավորեն համագործակցության լայն դաշտ տարբեր երկրների գործընկերների հետ ու նպաստեն ընդհանուր անվտանգության զարգացման խնդրին:
