ԵՐԵՎԱՆ, 23 նոյեմբերի- Sputnik. Ռուսական ավիախմբի ինքնաթիռներն անցած երկու օրում 141 թռիչք են կատարել և Սիրիայում հարվածներ հասցրել ահաբեկիչների օբյեկտներին, երկուշաբթի հայտարարել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը։
«Ռուսական ռազմատիեզերական ուժերի ինքնաթիռները 141 մարտական թռիչք են կատարել և Հալեպում, Դամասկոսում, Իդլիմում, Լաթաքիայում, Համայում, Հոմսում, Ռաքայում, Դեր Զորում հարվածներ հասցրել ահաբեկիչների 472 օբյեկտի»,- ասել է Կոնաշենկովը։
Նրա խոսքով` անցած վերջին երկու օրում ռուսական ավիախումբը շարունակել է թիրախների ակտիվ հետախուզությունը և հարվածներ հասցրել առանձին ահաբեկչական խմբավորումների։
Ինչպես պարզաբանել է ռազմական գերատեսչության ներկայացուցիչը, մարտական առաջադրանքներ կատարելուց հետո բոլոր ռուսական ինքնաթիռները բարեհաջող վերադարձել են «Հմեյմիմ» ավիաբազա։
Սեպտեմբերի 30-ից Ռուսաստանը նախագահ Բաշար Ասադի խնդրանքով սկսել է կետային ավիահարվածներ հասցնել Սիրիայում «Իսլամական պետության» օբյեկտներին` օգտագործելով Սու-25, Սու-24Մ, Սու-34 ռմբարկուներ։ Նոյեմբերի կեսին գործարկվել է նաև ռուսական ռազմավարական ավիացիան` Տու-160, Տու-95ՄՍ և Տու-22ՄԶ ինքնաթիռները։
