ԵՐԵՎԱՆ, 20 նոյեմբերի- Sputnik. Սանտա Բարբարայի համալսարանի բժիշկները ստեղծել են աշխարհում առաջին հաբը, որը թույլ է տալիս դիաբետիկներին ինսուլին ընդունել` առանց ներարկումների։ Գիտնականներն իրենց հայտնագործության մասին պատմել են Օռլանդոյում ԱՄՆ Դեղագործների ասոցիացիայի հանդիպման ժամանակ։
«Եթե մենք խոսում ենք դիաբետի մասին, ապա մեզ համար չափազանց կարևոր է ինսուլին ստանալու մեթոդների դյուրացումը։ Այսօր դիաբետիկները ստիպված են օրական յոթ անգամ ինսուլին ներարկել, ինչը հաճախ մեծ խնդիր է դառնում նրանց համար։ Հոգեբանական անհարմարությունը հաճախ հանգեցնում է դեղի ընդունման ռեժիմի խախտումների, բարդացումների և հոսպիտալացման»,- հայտարարել է Կալիֆոռնիայի համալսարանի գիտնական Սամիր Միտրագոտրին։
Բժիշկները բացատրում են, որ երբ ինսուլինն օրգանիզմ է թափանցում հաբի տեսքով, ապա մարսողական հյութերը մոլեկուլները քայքայում են ստամոքսում և աղիքներում, ուստի գիտնականներն արդեն մի քանի տասնամյակ է` փորձում են հորմոնի մոլեկուլները մարսողական համակարգից պաշտպանելու ուղիներ գտնել։
Միտրագոտրին և նրա գործընկերներն առաջին անգամ կարողացել են այնպիսի հաբեր ստեղծել, որոնք ոչ միայն կարողանում են օրգանիզմին ինսուլին հասցնել, այլ նաև նվազեցնել դեղերի չափաբաժինը։ Նրանց ստեղծած հատուկ «նանոսպեղանիները» կարողանում են կպչել աղիքների պատերին։
Միտրագոտրիի խոսքով` կանոնակարգող մարմիններն առայժմ դեռ չեն հաստատել այդ հաբերը, որոնք դեռ պետք է կլինիկական փորձարկումներ անցնեն։ Թույլտվությունները ստանալուց հետո Սանտա Բարբարայի համալսարանի գիտնականները կստուգեն`արդյո՞ք այդ նանոսպեղանիներով հաբերը հնարավոր կլինի օգտագործել այլ դեղամիջոցների համար` աճի հորմոնի, հակամարմինների և պատվաստանյութերի համար, որոնք նույնպես քայքայվում են ստամոքսի և աղիքների ֆերմենտների և թթուների կողմից։
