ԵՐԵՎԱՆ, 19 նոյեմբերի- Sputnik. Փարիզի ահաբեկչությունների ենթադրվող կազմակերպիչ Ադբելհամիդ Աբաուդը սպանվել է ֆրանսիական հատուկ նշանակության ջոկատի գործողության ընթացքում, որն անցկացվել է նոյեմբերի 18-ին Սեն Դենի արվարձանում։ Այս մասին հայտնում է BBC-ի ռուսական ծառայությունը։
Փարիզի դատախազ Ֆրանսուա Մոլենի խոսքով` Աբաուդին ճանաչել են մահացածների շարքում։ Նրա անձը պարզել են մատնահետքերի միջոցով, քանի որ նրա մարմինը խիստ վնասվել է գրոհի ժամանակ տեղի ունեցած պայթյուների հետևանքով։
Ավելի վաղ հայտնի է դարձել, որ Փարիզի Սեն Դենի արվարձանում գրոհի ժամանակ մահացել է առնվազն երկու մարդ։ Նրանցից մեկը կին է եղել, որը պայթեցրել է իրեն։ Եվս ութ մարդ ձերբակալվել է։
Մոլենի խոսքով`Սեն Դենիում անցկացված գործողության շնորհիվ հնարավոր է դարձել կանխել առնվազն մեկ խոշոր ահաբեկչական գործողություն։ Ավելի վաղ տեղեկացվել էր, որ ահաբեկչության թիրախը կարող էր լինել Փարիզի Դեֆանս թաղամասը կամ օդանավակայանը։
Ադբելհամիդ Աբաուդը ծնվել է Մարոկկոյում, սակայն Բելգիայի քաղաքացիություն ունեցել։ 2010թ.-ին նա փարիզյան ահաբեկչությունների այլ հնարավոր մասնակիցների հետ պատիժ է կրել բելգիական բանտում` զինված կողոպուտի համար։
2013թ.-ին Աբաուդը միացել է «Իսլամական պետություն» ծայրահեղական խմբավորմանը, որի գործունեությունն արգելված է շատ երկրներում, այդ թվում` Ռուսաստանում և Մեծ Բրիտանիայում։ Հենց ԻՊ-ն է իր վրա վերցրել Փարիզում իրականացված ահաբեկչության պատասխանատվությունը։
Նոյեմբերի 14-ին Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալով՝ 129 մարդ է մահացել:
