Sputnik Արմենիան փոքրիկ հարցախույզ է անցկացրել մի քանի զբոսաշրջային գործակալությունների հետ և պարզել, որ մատչելի հանգիստ նախընտրող ու Եգիպտոսի ճամփան բռնող հայերը սկսել են երկմտել:
«Ավելի արկածախնդիրները գնում են, իսկ զգուշավորները նախընտրում են Ամանորն անցկացնել ապահով հայրենիքում»,- պատմեց տուրիստական գործակալության աշխատակից Անահիտ Պետրոսյանը:
«Առանց հատուկ անհրաժեշտության զերծ մնալ Եգիպտոս այցելություններից». սա ՀՀ արտգործնախարարության հայտարարությունն էր այն բանից հետո, երբ տեղեկություն տարածվեց, որ Սինայի թերակղզում A321 օդանավի կործանման պատճառն ահաբեկչությունն էր: Զգուշավորության չափաքանակն ավելացավ, քանի որ ահաբեկչությունների հզոր ալիքն անցավ աշխարհի մի շարք երկրների վրայով:
Հայաստանցիները սկսեցին ականջալուր լինել նախարարության հորդորին: Շատերը դիմեցին տուրիստական գործակալություններին և խնդրեցին վերադարձնել նախապես ձեռք բերված փաթեթների գումարները: Սակայն շատ տուրօպերատորներ պայման դրեցին` կամ մնում եք, կամ գնում, բայց գումարի վերադարձ չկա:
«Դիմում եմ մեր բոլոր քաղաքացիներին, որ զբոսաշրջության փաթեթներ ձեռք բերելիս պահանջեն ու կնքեն համապատասխան պայմանագիր ու լինեն հետևողական: Զբոսաշրջության մասին ՀՀ օրենքի համաձայն, պայմանագիր կնքելուց առաջ էլ քաղաքացուն պետք է տեղեկացնեն, թե տվյալ երկիրն ինչ առանձնահատկություններ ունի, առողջությանը սպառնացող ինչ վտանգներ կան»,-ասաց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը:
Ապրեսյանը նաև ավելացրեց, որ պայմանագրով պարտադիր պետք է արձանագրել չեղարկման պայմանները: Եթե զբոսաշրջային կազմակերպությունը խախտում է օրենքով սահմանված դրույթները, ապա քաղաքացին կարող է դատարան դիմել և վերականգնել իր իրավունքները:
Գոհար Սարգսյան
