ԵՐԵՎԱՆ, 14 նոյեմբերի — Sputnik. ԵՄ-ի անխոհեմ միգրացիոն քաղաքականությունը տանում է ինքնասպանության, Sputnik Արմենիա պորտալին ասաց Սորբոնի համալսարանի քաղաքագիտության դոկտոր Հայկ Մարիտիրոսյանը` մեկնաբանելով Փարիզում տեղի ունեցած ահաբեկչությունները:
«Ֆրանիսան այն երկրներից է, որն առավել չմտածված և խելահեղ միգրացիոն քաղաքականություն է տանում, և հենց դա է դարձել պատճառը, որ երկրում այսօր գործում են մի շարք սունիթական իսլամիստներ: Ես կարծում եմ, որ այս ողբերգությունն անխուսափելի էր: Կարծում եմ, որ նմանատիպ դեպքեր կլինեն ոչ միայն Ֆրանսիայում, այլև մի շարք այլ պետություններում: Կարծում եմ, որ Ռուսաստանում նույնպես կլինեն, քանի որ իրադարձությունների ողջ տրամաբանությունը դա է հուշում», — ասաց Մարտիրոսյանը:
Ինչ վերաբերում է Ֆրանսիայի պատասխանին, ապա, նրա խոսքերով, կա երկու ճանապարհ` ահաբեկչության դեմ պայքարել այնպես, ինչպես այսօր, կամ անցնել ավելի լուրջ իրական քայլերի, ինչը ենթադրում է զանգվածային դեպորտացիա իրականացնել:
«Սակայն չեմ կարծում, որ նրանք համարձակություն կունենան նման բան անել: Այդ քայլը ենթադրում է, որ երկիրը պետք է մաքրվի այն ամբողջ աղբից, որը գոյություն ունի երկրում», — ասաց Մարտիրոսյանը:
Փորձագետի խոսքերով` դա արդեն էական չէ, նրանք այստեղ ներթափանցել են փախստականների վերջին ալիքի՞ հետ, թե՞ ոչ, քանի որ մինչև այդ էլ Եվրոպան լի էր արմատական իսլամիստներով:
«Չգիտեմ` կփոխվի՞ փախստականների նկատմամբ տարվող քաղաքականությունը, սակայն այն ամենաթող միգրացիոն քաղաքականությունը, որը տարվում է ողջ ԵՄ-ում, հստակ կերպով ինքնասպանության տանող ճանապարհ է, դեպի որը Եվրոպան գնում է վստահ քայլերով և մեծ ցանկությամբ: Ես չեմ կարծում, որ նրանք բավականին խելամիտ կգտնվեն և կփորձեն կտրուկ կասեցնել այս միգրացիոն հոսքը», — ընդգծեց Մարտիրոսյանը:
Փարիզում ուրբաթ երեկոյան տեղի են ունեցել մի շարք ահաբեկչություններ: Անհայտ անձը կրակ է բացել ֆրանսիական մայրաքաղաքի 10-րդ շրջանի ռեստորաններից մեկում, երեք պայթյուն է որոտացել «Ստադ դե ֆրանս» մարզադաշտից ոչ հեռու, որտեղ անցկացվում էր Ֆրանսիայի և Գերմանիայի ֆուտբոլային հավաքականների ընկերական խաղը, և որին ներկա էր Ֆրանսիայի նախագահ Ֆրանսուա Օլանդը:
