ԵՐԵՎԱՆ, 13 նոյեմբերի-Sputnik. Հայաստանում հինգշաբթի գրանցված ուժգին քամու հետևանքով մի շարք բնակավայրերում տների տանիքներ են վնասվել, ծառեր արմատախիլ եղել ու պոկվել հոսանքալարերը:
«Այս պահին տանիքի գլխին եմ: Փող եմ պարտքով վերցրել, շիֆերներ եմ գնել, որ տանիքս վերանորոգեմ: Գյուղապետարանում ինձ ասացին` վնասված հատվածները նկարի, բեր ու մի բան կանենք: Մինչև որոշեն փոխհատուցման չափը, անձրև կգա ու մեկս երկու կդառնա»,- պատմեց Սևքար գյուղի մի բնակիչ:
Ուրբաթ ժամը 16:00-ի դրությամբ Տավուշի մարզի Սևքար գյուղի 80 տոկոսը հոսանքազրկված է: Մասնագետները վերականգնողական աշխատանքներ են իրականացնում: Գյուղի բնակիչներից Մովսեսը տեղեկացրեց, որ երեկ ուժգին քամու հետևանքով պոկվել են հոսանքալարերն ու վնասվել տների տանիքները:
Մեր զրուցակցի խոսքով` քամին այնքան ուժգին էր, որ վախենում էին տնից դուրս գալ, չնայած նաև դա անհնար է եղել, իսկ վտանգները` անխուսափելի:
Նոյեմբերի 12-ի ավերիչ քամուց առավել մեծ մասշտաբով տուժել է Լոռու մարզը:
«Նախնական տվյալով` Լոռու մարզում վնասվել է 165 շենքի և շինության տանիք, գրանցվել է ծառերի տապալման 30 և գազատար խողովակների վնասման 5 դեպք»,-Sputnik լրատվական պորտալին հայտնեց ՏԿԱԻՆ փրկարար ծառայության ՃԿԿ ավագ հրահանգիչ Արա Սահակյանը:
Նախօրեին ժամը 16:50-ի տվյալներով` Լոռու մարզի հանքարդյունաբերական քաղաքում` Ալավերդիում, դադարեցվել է երթևեկությունը, քանի որ վնասվել են սնուցող բարձրավոլտ լարերի հենասյուները: Քաղաքապետարանում կազմվել է հանձնաժողով` վնասի չափերը ճշտելու նպատակով:
Մեզ չհաջողվեց խոսել տեղի բնակիչների հետ, քանի որ բոլորը միահամուռ կերպով լծված են քանդվածը վերականգնելու գործին:
Ամբողջացնենք պատկերը նաև Հանրապետության այլ բնակվայրերում:
Տավուշի մարզում վնասվել է 11 շենք-շինության տանիք և շրջվել 3 ծառ:
Կոտայքի մարզում վնասվել է 35 շենք-շինության տանիք և շրջվել 12 ծառ:
Բնակիչների ահազանգից անմիջապես հետո հանրապետության տարբեր բնակավայրեր են մեկնել օպերատիվ խմբեր: Նրանք վերացրել են վտանգներն ու կատարել ապամոնտաժումներ: Տուժածներ ու վիրավորներ չկան:
Ինչ վերաբերում է մայրաքաղաք Երևանին, այստեղ վնասվել է 1 շինության տանիք ու շրջվել 6 ծառ: Օրինակ` Ազատության պողոտայում բարդին թեքվել էր ճանապարհի երթևեկելի մասի վրա: Կարճ ժամանակում ՏԿԱԻՆ օպերատիվ խմբերը փակված ճանապարհից հեռացրել են ճյուղերը` վերականգնելով երթևեկությունը:
