ԵՐԵՎԱՆ, 11 նոյեմբերի – Sputnik. Ռուսաստանի հայերի միության նախագահ Արա Աբրահամյանը Sputnik Արմենիա միջազգային մամուլի կենտրոնում Մոսկվա – Երևան «Ռուս–հայկական հարաբերություններ. եվրասիական ինտեգրացումը և տեղեկատվական գործոնը» տեսակամրջի ժամանակ հայտարարեց, որ մոտ ժամանակներս կստեղծվի Եվրասիական տնտեսական միության միասնական տեղեկատվական կենտրոն։
«ԵՏՄ–ն կարևոր և ճիշտ ժամանակին ստեղծված կազմակերպություն է, որը Հայաստանի համար շատ մեծ նշանակություն ունի։ Այն կկարողանա օգտագործել Ռուսաստանի, Ղազախստանի, Բելառուսի և Ղրղըզստանի հնարավորությունները, նրանց գիտական ու արտադրողական ներուժը և շուկան։ Այսօր ԵՏՄ–ի վերաբերյալ բազմաթիվ քննադատություններ են հնչում, ամենակարևոր գործոնը տեղեկատվության, տեղեկատվական կենտրոնի բացակայությունն է, որը ճշգրիտ տեղեկություն կներկայացներ», – ասաց Աբրահամյանը։
Նրա խոսքով` Միության տրամադրած հնարավորությունների օգտագործման հստակ մեխանիզմ չկա, հենց այդ պատճառով էլ Ռուսաստանի հայերի միությունը և Համաշխարհային հայկական կոնգրեսը երկու շատ կարևոր միջոցառում են նախատեսում իրականացնել։
«2016 թվականի հուլիսի 22-26-ը Երևանում կանցկացվի միջազգային տնտեսական ֆորում, որին մասնակցելու են 37 երկրների ներկայացուցիչներ։ Մյուսը «Եվրասիական երկխոսություն» Եվրասիական տեղեկատվական կենտրոնի ստեղծումն է, որը փոխանցելու է ԵՏՄ տարածքում առկա բոլոր անհրաժեշտ տեղեկատվությունը` կապված գիտական ձեռքբերումների, կրթության, նոր տեխնոլոգիաների, առևտրային և գործարար հոնարավորությունների և այլ ոլորտներում տեղի ունեցած փոփոխությունների մասին», – ասել է Աբրահամյանը։
Նրա խոսքերով` տեղեկատվական կենտրոնի ստեղծման մանրամասները, դրա մասնակիցներն ու այլ տեղեկատվություն հայտնի կդառնա արդեն նոյեմբերի վերջին։
Հայաստանի ԱԺ պատգամավոր, «Օրինաց երկիր» կուսակցության նախագահի տեղակալ, Ռուսաստանի հայերի միության նախագահի առաջին տեղակալ Մհեր Շահգելդյանը նույնպես նշեց եվրասիական կառույցների զարգացման ու կայացման ուղղությամբ աշխատելու, ինչպես նաև տեղեկատվական աջակցությու տրամադրելու անհրաժեշտությունը։
«Տեղեկատվության տարածումն ու շրջանառությունը պետք է բազմակողմանի և ժամանակին լինի։ Հասարակությունը մշտապես պետք է նոր տեղեկություն ստանա ապրանքաշրջանառության, ֆիսկալ հարաբերությունների և այլնի մասին», – ասաց Շահգելդյանը։
Տեղեկատվության անվտանգության հարցերի մասնագետ Տիգրան Քոչարյանի խոսքով` Հայաստանում շատերը ԵՏՄ–ն պատկերացնում են որպես բացառապես Հայաստանի և Ռուսաստանի միություն, որովհետև Բելառուսի, Ղազախստանի դերը հասարակության համար անհասկանալի է։
«Ավելին` նույն Ղազախստանը, լինելով դաշնակից, հաճախ հակահայկական որոշումներ է ընդունում։ Տնտեսական առումով Հայաստանի շուկայում անտեսանելի է Ղազախստանի, Բելառուսի և առավել ևս` Ղրղըզստանի ներկայությունը։ Այդ ներկայությունը պետք է ավելանա», – ասաց Քոչարյանը։
«Ցանկացած տնտեսական միություն կգոյատևի այնքան ժամանակ, քանի դեռ չկա մեկ այլ առաջարկ ուրիշի կողմից։ Ես համոզված չեմ, որ ԵՏՄ անդամները ԱՄՆ–ից կամ Չինաստանից ավելի ձեռնտու առաջարկ ստանալու դեպքում չեն օգտվի դրանից», – ընդգծեց Քոչարյանը։
ԵՏՄ–ն միջազգային ինտեգրացիոն տնտեսական միություն է, որը ստեղծվել է Մաքսային միության և Միասնական տնտեսական տարածքի հիման վրա։ ԵՏՄ–ն գործում է այս տարվա հունվարի 1–ից։ Հիմա ԵՏՄ–ի անդամներն են Ռուսաստանը, Հայաստանը, Բելառուսը, Ղազախստանն ու Ղրղըզստանը։
