ԱԳՆ. ՌԴ–ն ու Երևանը մտահոգված են Մերձավոր Արևելքում քրիստոնյաների իրավունքների ոտնահարմամբ

ԵՐԵՎԱՆ, 9 նոյեմբերի – Sputnik. Ռուսաստանն ու Հայաստանը մտահոգված են Մերձավոր Արևելքում քրիստոնյաների իրավունքների ոտնահարմամբ, հայտնել է ՌԴ ԱԳՆ ղեկավար Սերգեյ Լավրովը։

«Ռուսաստանն ու Հայաստանը լուրջ մտահոգված են քրիստոնյաների ճակատագրով, ովքեր ճգնաժամի ու ահաբեկչության պայմաններում, առաջին հերթին, այսպես կոչված, «Իսլամական պետության» կողմից, հալածանքների, խտրականության են ենթարկվում, և նրանց կյանքի համար լուրջ սպառնալիք են այդ ահաբեկչական կառույցն ու նրա հանցակիցները», – ասել է Լավրովը Հայաստանի ԱԳՆ ղեկավար Էդվարդ Նալբանդյանի հետ բանակցությունների արդյունքում։

Լավրովը հայտնեց, որ Ռուսաստանն ու Հայաստանն են եղել ՄԱԿ–ի մարդու իրավունքների խորհրդում Մերձավոր Արևելքում քրիստոնյաների իրավունքների պաշտպանությանը նվիրված հատուկ միջոցառման նախաձեռնողները։

«Մենք նշում ենք, որ այդ թեմային աջակցել են բազմաթիվ մեր գործընկերներ, այդ թվում` Լիբանանը և Վատիկանը, այլ միջազգային կառույցներ, և այժմ մի շարք միջոցառումների են նախապատրաստվում այս սուր և մեզ համար սկզբունքորեն կարևոր խնդրի վերաբերյալ», – նշել է ՌԴ ԱԳՆ ղեկավարը։