Ավստրալուհին կորցրել է շահումը, երբ համացանցում հրապարակել է մրցանակային կտրոնով սելֆին

ԵՐԵՎԱՆ, 6 նոյեմբերի– Sputnik. Համացանցից օգտվողներին բազմաթիվ անգամ զգուշացրել են, որ հետևեն, թե ինչ լուսանկարներ են հրապարակում համացանցում։ Սակայն մարդիկ շարունակում են հրապարակել այնպիսի տեղեկություններ, որոնցից օգտվում են չարագործները։

Ավստրալուհին հաջողացրել է Մելբուրնի գավաթում 825 դոլար շահել և իսկույն կորցնել այն։ Շանտել անունով աղջիկը խաղադրույք է կատարել ձիերից մեկի վրա և շատ է ուրախացել, երբ իր նժույգն առաջինն է տեղ հասել։

Աղջիկը սելֆի է արել, և նկարում երևացել է նաև այն կտրոնը, որով պետք է գումարը ստանար։ Նա լուսանկարը տեղադրել է Facebook-ում` չմտածելով, որ կադրում երևում է նաև կանխիկ գումարը ստանալու ծածկագիրը։ Օգտատերերից մեկն օգտվել է նրա անուշադրությունից։ Անհայտ չարագործը ծածկագիրը մոտեցրել է շահումը տրամադրող ավտոմատին և վերցրել գումարը։

Ինչպես գրում է News.com.au–ն, ինչ–որ մեկը դա արել է ընդամենը 15 րոպեում։ Շանտելը պատմել է, որ նախկինում երբեք խաղադրույքներ չի կատարել, առաջին անգամ է նման քայլի գնացել, և երբ հայտարարվել է ձիարշավի հաղթողը, աղջիկն այնքան է ուրախացել, որ որոշել է իր ոգևորությունը հայտնել նաև համացանցի ընկերներին։ Բառացիորեն 15 րոպե անց, երբ նրա նկարը հրապարակվել է սոցցանցում, ավստրալուհին գնացել է շահումը վերցնելու։ Այդ ժամանակ էլ իմացել է, որ գումարն արդեն ինչ–որ մեկը վերցրել է։

Կասկածի տակ են առել աղջկա էջի բաժանորդներից մեկին, նրան, ով ամենաառաջինն է տեսել սելֆին։ Չի բացառվում, որ չարագործը կարող էր նաև աղջկա նկարում նշված  ընկերներից որևէ մեկի էջի «բաժանորդներից» լինել։ Ոստիկանությունը քննում է գործը, իսկ Շանտելն ու նրա ընկերները պատրաստվում են «հետախուզություն» անցկացնել իրենց ֆեյսբուքյան ընկերների շարքում։

Ոստիկանությունից տեղեկացրել են, որ գողին հեշտությամբ կարելի է գտնել, քանի որ հայտնի է, թե նա ժամը քանիսին է գումարը վերցրել։